Qasym-Jomart Toqaev Jaıyq ózeniniń ekologııalyq ahýalyna alańdaýshylyq bildirdi

NUR-SULTAN. QazAqparat – Jaıyq ózeniniń ekologııalyq ahýaly kúrt nasharlap barady. Memleket basshysy Qasym-Jomart Toqaev Úkimettiń keńeıtilgen otyrysynda osy máselege nazar aýdarý kerektigin málim etti, dep habarlaıdy QazAqparat tilshisi.

«Meniń tapsyrmam boıynsha sý resýrstaryn basqarýdyń ulttyq jospary daıyndaldy. Ony qabyldap, qarjylandyrý isin tezdetý qajet. Qazir Jaıyq ózeniniń ekologııalyq ahýaly kúrt nasharlap barady. Byltyrǵy jeltoqsanda Qazaqstan-Reseı yntymaqtastyǵynyń 2024 jylǵa deıingi baǵdarlamasy qabyldandy. Bul qujattyń negizgi maqsaty – Jaıyq ózeni ańǵarynyń ekojúıesin saqtaý. Úkimetke ony sapaly túrde júzege asyrýdy tapsyramyn. Jalpy sý dıplomatııasynyń tásilderin aıtarlyqtaı nyǵaıtýymyz kerek. Qazaqstan úshin bul óte qajet nárse. Sebebi tuşy sý bizde óte tapshy», - dedi Qasym-Jomart Toqaev Úkimettiń keńeıtilgen otyrysynda.

Eske sala ketsek, Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.

Onlaın formattaǵy jıynda eldiń áleýmettik-ekonomıkalyq damýynyń 2020 jylǵy qorytyndylary men aldaǵy jospary talqylanýda.