Qasym-Jomart Toqaev jańadan qosylatyn senatorlardy ne kútip turǵanyn aıtty
ASTANA. QazAqparat - Parlament Senatynyń tóraǵasy Qasym-Jomart Toqaev sońǵy jalpy otyrysqa qatysyp otyrǵan áriptesterine atqarǵan jumystary úshin alǵys aıtty, dep habarlaıdy QazAqparat.
«Keshe elimizde Konstıtýtsııa talaptaryna sáıkes Senat depýtattarynyń kezekti saılaýy ótti. Saılaýshylardyń senimine ıe bolyp, qatarymyzǵa jańadan qosylatyn áriptesterimiz palatanyń zań shyǵarý jumysynyń pármendiligin arttyrýǵa tyń serpin beretinine kámil senemin. Al búgin sońǵy jalpy otyrysqa qatysyp otyrǵan áriptesterge shyn júrekten alyǵysymyzdy aıtamyz jáne sizderge arnalǵan erteńgi saltanatty jıynǵa shaqyramyz»,-dep toqtaldy ol palatanyń jalpy otyrysynda.
Osy oraıda Q. Toqaev áriptesterine palatanyń konstıtýtsııalyq ókilettigin iske asyrý boıynsha birlesip atqarǵan nátıjeli qyzmetteri úshin rızashylyǵyn bildirdi.
«Tutastaı alǵanda, elimizdiń qoǵamdyq-saıası jáne áleýmettik-ekonomıkalyq ómiriniń jańa kezeńine beıimdelgen zańnamalyq bazany jetildirý boıynsha tyńǵylyqty jumys jasaldy. Aldymyzda Elbasynyń ekonomıkalyq, tehnologııalyq jáne rýhanı sanany túbegeıli jańǵyrtý jónindegi strategııalyq mindetin oryndaýmen baılanysty qaýyrt jumystar kútip tur. Parlament qorjynynda kúzgi sessııada qaralatyn 30-ǵa jýyq zań jobasy bar. Osy rette Prezıdenttiń árqaısymyzǵa júktegen jaýakershilik salmaǵyn tereń sezine otyryp, halqymyzdyń ıgiligi jolynda belsene jumys jasaıtymyzǵa kámil senemin»,-dep túıindedi sózin Senatynyń tóraǵasy.
Aıta keteıik , QR OSK Senat depýtattary saılaýynyń qorytyndysyn shyǵardy. Saılanǵan depýtattardyń 7-eýin máslıhattar usynsa, 9-y ózin-ózi usynǵandar. QR Parlamenti Senatynyń depýtattyǵyna kandıdattardyń ortasha jasy - 56,7. QR Parlamenti Senatynyń depýtattaryn saılaý qorytyndysy boıynsha saılanǵandardyń tizimi anyqtaldy.
