Qasym-Jomart Toqaev Jambyldaǵy jarylys saldaryn joıýǵa qatysqan mamandarǵa alǵys aıtty
NUR-SULTAN. QazAqparat – Memleket basshysy Jambyl oblysyndaǵy jarylystyń saldaryn joıýǵa atsalysqan qutqarýshylarǵa, dárigerlerge, polıtsııa, prokýratýra jáne ákimdik qyzmetkerlerine alǵys aıtty, dep habarlaıdy QazAqparat tilshisi.
«Memlekettik ýákiletti organdar qaza tapqan azamattardyń otbasylaryna kómek kórsetýdiń barlyq sharalaryn qabyldaýy qajet. Jumyldyrylǵan barlyq sala mamandarynyń jankeshtiliginiń arqasynda jaǵdaı baqylaýǵa alynyp, odan da kóp shyǵynǵa jol berilmedi. Qutqarýshylarǵa, dárigerlerge, polıtsııa, prokýratýra jáne ákimdik qyzmetkerlerine alǵys aıtamyn. Degenmen órttiń saldary qıynǵa soqty. Adamdar zardap shekti. Kóptegen azamat baspanasyn tastap ketýge májbúr boldy. Eldi mekenderdiń ınfraqurylymyna zaqym kelip, birqatar ǵımarattar qırap qaldy. Osyǵan baılanysty shuǵyl sharalar qabyldandy. Biraq áli de kóp qalpyna keltirý jumystaryn júrgizý kerek, - dedi Qasym-Jomart Toqaev tótenshe oqıǵa boıynsha ótken shuǵyl jınalysta.
Sondaı-aq, Prezıdent Bas Prokýratýra men Іshki ister mınıstrligine Jambyl oblysyndaǵy oqys oqıǵanyń mán-jaıyn jáne kinálilerdi anyqtaý úshin sotqa deıingi tergeý amaldaryn muqııat júrgizýdi tapsyrdy.
Aıta keteıik, 26 tamyz kúni saǵat 19:00-de Jambyl oblysynyń Baızaq aýdanynda ornalasqan áskerı bólim qoımalarynyń birinen órt shyǵyp, jarylys boldy.
