Qasym-Jomart Toqaev Jambyl oblysynda qus fabrıkasynyń jumysymen tanysty

BAIZAQ. QazAqparat - Prezıdent Qasym-Jomart Toqaev Jambyl oblysyna jumys sapary aıasynda Baızaq aýdany Myrzataı aýylyndaǵy «Áýlıe Ata Fenıks» qus fabrıkasyna bardy. QazAqparat bul týraly Aqordaǵa silteme jasap habarlaıdy.

Memleket basshysy óndiris ornyndaǵy tsehtardy aralap kórdi. Prezıdentke qus fabrıkasynyń jetekshisi Farıda Júnisova kásiporynnyń jumysy týraly baıandady.

Qazirgi ýaqytta golland tehnologııasymen 1 mıllıon balapan ósiretin óndiris ornynda 250-ge jýyq aýyl turǵyny jumys isteıdi. Kásiporyn jyl saıyn 8 myń tonna broıler etin óndiredi, sondaı-aq ónim ishki naryqqa jetkiziledi jáne Reseıge, Qyrǵyzstanǵa eksporttalady.

Bıyl qus fabrıkasynyń óndiristik qýatyn 12 myń tonnaǵa deıin arttyrý úshin jalpy quny 1,4 mıllıard teńgeni quraıtyn 6 nysan salý josparlanyp otyr.

Kásiporyn jumysymen tanysý barysynda Qasym-Jomart Toqaevqa óńirdegi qus sharýashylyǵynyń damýy jóninde málimet berildi.

Eske salaıyq, Prezıdent Jambyl oblysynda jumys saparymen júr.

Q.Toqaev jazýshy Sherhan Murtazanyń eskertkishine gúl shoǵyn qoıǵannan keıin zııaly qaýym ókilderimen áńgimelesti.

Keıin Memleket basshysy Sherhan Murtaza atyndaǵy Halyqaralyq Taraz ınnovatsııalyq ınstıtýtynyń Stýdentter úıinde oqý ornynyń oqytýshylarmen jáne stýdenttermen kezdesti.

Baızaq aýdanynyń Kóktal aýyldyq orta mektebiniń jumysymen tanysqan Qasym-Jomart Toqaev ustazdar qaýymymen júzdesip, jańa ári jaıly mektepte bilim alyp jatqan oqýshylarǵa tabys tiledi.

Foto: akorda.kz