Qasym-Jomart Toqaev volonterlik jumystardyń negizgi baǵyttaryn atady

NUR-SULTAN. QazAqparat - Volonterlik saǵattardy eńbek ótiline esepteýdiń ádistemesin engizý qajet. Bul týraly búgin Jastar jylynyń jabylý jáne Volonter jylynyń ashylý saltanatynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Volonterler balalar úılerindegi balalardy qamqorlyqtaryna ala alady. «Saýlyq» baǵyty arqyly medıtsınalyq volonterlik damyp, naýqastarǵa qamqorlyq kórsetiledi. «Taza álem» jobasy - bul qorshaǵan ortany qorǵaý, ózender men ormandardy tazalaý, aǵash otyrǵyzý, qoqysty suryptaýǵa úıretý. «Asyl mura» baǵyty volonterlerdi halqymyzdyń materıaldyq jáne rýhanı mádenı-tarıhı murasyn saqtaýǵa tartady. «Qamqor» baǵyty eriktilerdiń qarttar úılerinde jumysyna baǵyttalǵan. «Bilim» - bul aýyl mektepteriniń joǵary synyp oqýshylaryn UBT-ǵa daıyndaý, aǵylshyn tili men kompıýterlik saýattylyqqa oqytý. Al «Úmit» jobasyn Ekinshi dúnıejúzilik soǵystaǵy jeńistiń 75 jyldyǵyna oraı otandastarymyzdyń erlikterin pash etetin qujattardy izdeýge baǵdarlaýǵa bolady»,- dedi Qasym-Jomart Toqaev.

Memleket basshysy volonter-zańgerlerdi halyqtyń quqyqtyq saýatyn arttyrý jumystaryna, quqyqtyq máseleler boıynsha azamattarǵa konsýltatsııalyq kómek kórsetýge tartý qajettigin basa aıtty.

«Úkimettik emes uıymdardy naqty qoldaý úshin memleket árbir baǵyt boıynsha granttar bóledi. Volonterlik saǵattardy eńbek ótiline esepteýdiń ádistemesin engizý de mańyzdy. Bul ásirese osy salada turaqty jumys isteıtinderge qatysty. Menińshe, bul óte mańyzdy», - dedi QR Prezıdenti.