Qasym-Jomart Toqaev volonterlik jobalardy kelesi jyly jalǵastyrýdy tapsyrdy

NUR-SULTAN. QazAqparat – Memleket basshysy Qasym-Jomart Toqaev volonterlerdi qoldaý tetikteri – «Volonterler jylynyń» aıaqtalýymen birge umytylmaýy kerektigin eskertti, dep habarlaıdy QazAqparat tilshisi.

«Ekologııalyq máselelermen qatar ekologııalyq týrızmdi belsendi túrde damytý kerek. Sonyń ishinde erekshe qorǵalatyn aýmaqta da. Ulttyq jáne memlekettik parkterdi damytý boıynsha josparlardyń talqylanýyna qoǵam ókilderin shaqyrý tájirıbesin engizý kerek», - dedi Prezıdent Ulttyq qoǵamdyq senim keńesiniń otyrysynda.

Memleket basshysynyń aıtýynsha, ekologııalyq máselelerdiń kún tártibinde volonterler erekshe mańyzdy rólge ıe.

«Meniń bastamammen jarııalanǵan bıylǵy «Volonterler jyly» Qazaqstanda eriktilerdiń qozǵalysy qanshalyqty qarqyndy túrde damyp kele jatqanyn kórsetti. Volonterlik – kóptegen adamdar úshin ómir saltyna aınaldy. Shynynda da muqtaj adamdar kómek aldy. Bul baǵyttaǵy jumys Volonterler jyly aıaqtalǵannan keıin támamdalyp qalmaýy kerektigin eskertemin. Volonterlik jobalardy júzege asyrýdy ary qaraı jalǵastyrý jáne ártúrli ekologııalyq máselelerdiń sheshimi úshin eriktilerdi tartý mindetin tapsyramyn», - dedi Prezıdent.