Qasym-Jomart Toqaev Vladımır Pýtınge kóńil aıtý jedelhatyn joldady
NUR-SULTAN. QazAqparat - Qazaqstan Prezıdenti Qasym-Jomart Toqaev RF Prezıdenti Vladımır Pýtınge Sheremetevodaǵy ushaq apatyna baılanysty kóńil aıtý jedelhatyn joldady, dep habarlaıdy QazAqparat.
Bul týraly Memleket basshysy Twitter-degi resmı paraqshasynda habarlady.
«Reseı Prezıdenti Vladımır Pýtınge Máskeýdegi Sheremetevo áýejaıynda bolǵan apatqa baılanysty kóńil aıtý jedelhatyn joldadym. Qaza bolǵandardyń týysqandary men jaqyndarynyń qaıǵysyna ortaqpyn» delingen jazbada.
Aıta keteıik, keshe Mýrmanskige baǵyt almaq bolǵan SSJ-100 jolaýshylar ushaǵy Sheremetevo áýejaıyna apattyq jaǵdaıda qonǵan sátte otqa orandy.
Keıin apat saldarynan 41 adam qaza bolǵany habarlandy. Qazirgi ýaqytta ajal qushqandar arasynda qazaqstandyqtardyń bar-joǵy tekserilýde.
