Qasym-Jomart Toqaev vıtse-premerden naqty ister talap etti
ASTANA. QazAqparat - QR Parlamenti Senatynyń tóraǵasy Qasym-Jomart Toqaev Premer-Mınıstrdiń orynbasary, Aýyl sharýashylyǵy mınıstri Asqar Myrzazmetovten naqty ister talap etti, dep xabarlaıdy QazAqparat.
«Árbir jańa mınıstrdiń qabyldaıtyn baǵdarlamalary - ıgi nıettiń ǵana baǵdarlamasyna aınalyp ketip jatyr. 2020 jyly taǵy bir jańa baǵdaralama týa ma dep qorqamyn. Jylyna 60 myń tonna ettiń eksporty bolady dep josparlanǵan baǵdarlama sekildi, ony da qatty nasıxattap ketetini anyq. Senatta aıtyp edik qoı, ol múmkin emes dep. Sol maqsatty nasıxattap ketkenderiń sonsha, Memleket basshysynyń aýzyna salyp berdińizder. Barlyǵyn jarǵa jyǵyp barasyzdar. Asqar Isabekuly, Siz aýyl sharýashylyǵy mamanysyz, Sizge barlyǵy senim artyp otyr, Sizge Premer-Mınıstrdiń orynbasary etip, erekshe quzyr berdi. Sheshim qabyldańyz, iske kóshý kerek qoı. Baǵdarlamany biz de jaza alamyz, qıyn bolyp pa!? Naqty ispen aınalysý kerek», - dedi Toqaev Senattyń plenarlyq otyrysynda mınıstrge qaratyp aıtqan sózinde.
2016 jylǵy respýblıkalyq bıýdjettiń atqarylýy týraly esepti tyńdaý barysynda senator Serik Bilálov aýyl sharýashylyǵyndaǵy sýbsıdııalaý baǵdarlamasy túpki nátıjege baǵyttalmaǵandyǵyn atap ótti. Óndiristegi ósim tıimdi texnologııalardyń esebinen emes, egistiktik alqaptardy jáne mal basyn kóbeıtýdiń arqasynda jetkizilýde.
Óz kezeginde, Asqar Myrzahmetov Agroónerkásiptik keshendi damytýdyń 2017-2021 jyldarǵa arnalǵan jańa baǵdarlamasy qabyldanǵanyn atap ótti. Jańa baǵdaralamanyń negizinde barlyq sýbsıdııalar túri qaıta qarastyryldy. Sýbsıdııanyń tıimsiz 11 túri alynyp tastaldy. Osynyń arqasynda jylyna 25 mlrd. teńge únemdeledi.
