Qasym-Jomart Toqaev: Túsiniksiz ıdeıany halyq qabyldamaıdy

ASTANA. QazAqparat – Túrkistanda ótip jatqan Ulttyq quryltaıdyń negizgi otyrysynda Prezıdent Qasym-Jomart Toqaev kez kelgen tujyrymdama men doktrınanyń halyqqa túsinikti bolýy mańyzdy ekenin aıtty, dep habarlaıdy QazAqparat tilshisi.

«Kez kelgen tujyrymdama nemese doktrına qarapaıym ári túsinikti bolýy kerek. Áıtpese, bári jasandy bolyp shyǵady. Ondaı ıdeıany halyq qabyldamaıdy. Ómirsheń, keleshegi zor ıdeologııalar memleket pen qoǵamnyń ortaq izdenisiniń arqasynda ǵana paıda bolady. Biz dástúrli qundylyqtarymyzdy qazirgi mádenı úrdistermen úılestirýimiz kerek», - dedi Memleket basshsy.

Qasym-Jomart Toqaev qazaqstandyq jastardy maqtan tutatynyn atap ótti.

«Elimizde otanshyl, jasampaz, batyl, daryndy, bilimdi, ozyq ári eńbekqor jandar óte kóp. Men osyndaı azamattardy kórgende bolashaǵymyzdyń jarqyn bolaryna zor senimmen qaraımyn. Táýelsiz Qazaqstanda rýhy azat, kózi ashyq, kókiregi oıaý urpaq ósip keledi. Olar ǵylym-bilim, mýzyka, kıno, sport jáne basqa da salalarda tabysqa jetip, búkil álemge tanymal bola bastady. Jastarymyz týǵan jerdiń qaıtalanbas ereksheligin jáne týǵan eldiń biregeı bolmysyn jer júzine tanytyp júr», - dedi Prezıdent.