Qasym-Jomart Toqaev: Túrik eliniń qaıǵysy – barsha túrki jurtynyń qasireti

ANKARA. QazAqparat - QR Prezıdenti Qasym-Jomart Toqaev Túrki memleketteri uıymynyń «Apat jáne tótenshe jaǵdaılar menedjmenti, gýmanıtarlyq kómek» atty kezekten tys sammıtinde sóz sóıledi, dep habarlaıdy Aqorda.

«Biz baýyrlas Túrkııaǵa úlken aýyrtpalyq ákelgen asa joıqyn jer silkinisine baılanysty jınaldyq. Myńdaǵan baýyrymyz qaza tapty. Marqumdardyń týǵan-týystaryna jáne búkil Túrkııa halqyna taǵy da kóńil aıtamyn. Alapat zilzalanyń zardabyn tartqan Túrik eliniń qaıǵysy – barsha túrki jurtynyń qasireti dep bilemin. Qazaqta «Qaıǵyny bólisseń – azaıady» degen sóz bar. Aǵaıynnyń basyna kún týǵanda bizdiń halqymyz eshqashan qol qýsyryp otyrmaıdy. Qazaqstan halqy birden túrik baýyrlarǵa qol ushyn sozdy. Qutqarýshylarymyz jáne dárigerlerimiz dereý kómekke attandy. Qajetti quraldarmen jabdyqtalǵan eń tájirıbeli, bilikti mamandarymyz qutqarý jumysyna atsalysty. Baýyrlas elge gýmanıtarlyq jáne qarjylaı kómek kórsetildi», - dedi Memleket basshysy.

Eske salsaq, keshe túnde Qasym-Jomart Toqaev TMU-nyń kezekten tys sammıtine qatysý úshin Ankaraǵa jumys saparymen bardy. Búgin Memleket basshysy Túrkııa Prezıdenti Rejep Taııp Erdoǵanmen kezdesti.