Qasym-Jomart Toqaev tranzıttik kólikterge saralanǵan janarmaı baǵasyn belgileýdi tapsyrdy
«Sarapshylardyń baǵalaýy boıynsha, kúzde elde dızel otynynyń tapshylyǵy týyndaýy múmkin. Bul jaǵdaı jyl saıyn egin jınaý naýqany kezinde qaıtalanyp keledi.
Úkimettiń negizgi ýáji – janarmaıdy bizdiń naryqtan tranzıttik kólikter men kórshi elderdiń irgeles aımaqtaryndaǵy turǵyndar syrtqa áketýi.
Biraq, másele odan tereńde jatyr – irgedegi elderge otandyq munaı ónimderin áketýdiń jyldar boıy ábden jolǵa qoıylǵan shemasy bar. Qarjylyq monıtorıng agenttigine osy máseleniń anyq-qanyǵyn tekserý kerek. Maǵan bul máselemen kim aınalysyp otyrǵany týraly naqty aqparat usynyńyzdar. Osydan keıin túbegeıli sheshim shyǵaramyz», - dedi Prezıdent.
Sondaı-aq, Memleket basshysy Úkimet pen Básekelestikti qorǵaý jáne damytý agenttigine shekara perımetri boıynsha tranzıttik kólikterge munaı ónimderiniń saralanǵan baǵasyn ázirleýdi tapsyrdy.
«Bul kórshi eldermen baǵa teńsizdigin tómendetip, ózimizdiń azamattarǵa arnalǵan baǵada kórinis tappaıdy», - dedi Qasym-Jomart Toqaev.
Aıta keteıik, Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.
