Qasym-Jomart Toqaev Shymkentti kóriktendirý jobalarymen tanysty

ShYMKENT. QazAqparat - QR Prezıdenti Qasym-Jomart Toqaev Shymkent qalasyna jumys saparymen keldi. Memleket basshysy aldymen qalanyń ákimshilik-iskerlik ortalyǵynda bolyp, megapolısti kóriktendirý jobalarymen tanysty, dep habarlaıdy QazAqparat tilshisi.

Qasym-Jomart Toqaevtyń nazaryna Shymkent City qalashyǵy men áýejaıdyń jańadan salynatyn termınalynyń, sondaı-aq, tsıtadel Qoshqar ata ózeniniń boıy jáne «Turan» shaǵynaýdanynyń jobalary usynyldy.

Aıta keteıik, ákimshilik-iskerlik ortalyqta kópqabatty 47 úı boı kóteredi (2990 páter). Onyń ishinde 33 úı bıýdjet esebinen salynsa, qalǵandary ınvestıtsııa esebinen turǵyzylady.

Al, qala irgesindegi jalpy alańy 1190 ga quraıtyn «Turan» shaǵynaýdanynda kópqabatty turǵyn úılerdiń, áleýmettik jáne kommertsııalyq nysandardyń qurylysy qarastyrylǵan. Jeke úılerdiń qurylysy úshin 3046 ýchaske bólinedi. Tórt myńǵa jýyq adam turatyn aýdanda jalpy uzyndyǵy 33,7 shaqyrym bolatyn 13 magıstraldy avtojol salynady. Ekinshi kezeńde jalpy uzyndyǵy 16,7 shaqyrym bolatyn, jaıaý júrginshiler jáne velojoldary bar 5 kósheniń qurylysy josparlanýda. Jobany júzege asyrý úshin «Óńirlerdi damytý - 2020» baǵdarlamasy boıynsha QR Ulttyq ekonomıka mınıstrligine 5,4 mlrd teńge kóleminde qarjy bólý týraly bıýdjettik suranys jiberildi. Úshinshi kezeńde jalpy uzyndyǵy 9,1 shaqyrym bolatyn qalǵan 5 kósheniń qurylysy júrgiziledi.

Buǵan qosa, jalpy quny 10,4 mlrd teńgege sýmen jabdyqtaý, sý ótkizý, elektrmen jáne gazben qamtý jelilerin tartý qajet.

Óz kezeginde shahar basshysy Ǵabıdolla Ábdirahymov Shymkent damýynyń jáne qurylys júrgizýdiń 2023 jylǵa deıingi keshendi jospary, aǵymdaǵy jaǵdaıy men damý keleshegi týraly baıandady. Qalada birqatar áleýmettik mańyzy bar jáne ınfraqurylymdyq nysandardyń qurylysy josparlanǵanyn jetkizdi. Olardyń qatarynda, áýejaıdyń jańa termınalynyń qurylysy, temir jol vokzalynyń, aınalma joldyń rekonstrýktsııasy, qoǵamdyq kólikti jańartý, elektrondy bılet berýdi engizý sharalary bar.