Qasym-Jomart Toqaev Shveıtsarııa Parlamenti tómengi palatasynyń spıkerin qabyldady
NUR-SULTAN. QazAqparat - Qasym-Jomart Toqaev Qazaqstanǵa resmı saparmen kelgen Shveıtsarııa Konfederatsııasy Federaldy Jınalysynyń Ulttyq Keńesiniń (tómengi palatasynyń) tóraǵasy Andreas Ebıdi qabyldady, dep habarlaıdy QazAqparat Aqordaǵa silteme jasap.
Memleket basshysy Shveıtsarııany Qazaqstannyń Eýropadaǵy mańyzdy seriktesteriniń biri ekenin aıta otyryp, olardyń ónerkásip, «jasyl» ekonomıka, aýyl sharýashylyǵy jáne qarjy salasyndaǵy joǵary ınnovatsııalyq áleýetin atap ótti.
Qazaqstan Prezıdenti bizdiń eldiń shıkizattyq emes sektoryna Shveıtsarııa kapıtaly men tehnologııalaryn tarta otyryp, jańa iri jobalardy iske asyrýǵa beıildi ekenin bildirildi. Memleket basshysynyń aıtýynsha, bul Qazaqstan ekonomıkasyndaǵy shveıtsarııalyq bıznestiń onsyz da berik pozıtsııasyn odan ári nyǵaıtýǵa yqpal etedi.
Shveıtsarııa – 2005 jyldan beri elimizdiń ekonomıkasyna 27 mıllıard dollardan astam ınvestıtsııa salǵan eń iri úsh ınvestorynyń biri. Bizdiń elde Glencore Xstrata, ABB, Philipp Morris, Rieter, Schindler, Bühler, Leica, Nestlé, Roche, Novartis, Syngenta, Ammann Group jáne basqa da iri shveıtsarııalyq kompanııalar tabysty jumys isteıdi.
Sonymen qatar Shveıtsarııamen aradaǵy taýar aınalymy byltyr 1,7 mıllıard dollarǵa jetip, jalpy saýda sekirteriniń arasynda 11-shi orynǵa ilingen. Memleket basshysy Qazaqstan men Shveıtsarııa arasyndaǵy qarym-qatynastardyń tabysty damýyna eki eldiń tyǵyz saıası baılanystary yqpal etedi degen pikirin bildirdi. Osyǵan baılanysty Qasym-Jomart Toqaev jaqynda Shveıtsarııa Prezıdenti Gaı Parmelandpen mazmundy kelissózder ótkizgenin atap ótti.
Jemisti baılanystardy jalǵastyrý úshin Memleket basshysy kelesi kezdesýdi bıyl qarasha aıynyń sońynda ótkizýge daıyn ekenin bildirdi.
Óz kezeginde Andreas Ebı ekijaqty yntymaqtastyqtyń qazirgi damý deńgeıin oń baǵalap, ony parlamentaralyq baılanystar arqyly nyǵaıtýǵa septesýge daıyn ekenin bildirdi. Osyǵan baılanysty «Qazaqstan - Shveıtsarııa» parlamentaralyq yntymaqtastyq tobynyń jumysyn jandandyrý týraly kelisimge qol jetkizildi.
Áńgimelesýshiler Aýǵanstandaǵy qazirgi jaǵdaıǵa erekshe nazar aýdardy. Taraptar bul másele boıynsha jan-jaqty pikir almasyp, osy eldegi áskerı-saıası jáne gýmanıtarlyq jaǵdaıdyń shıelenisýine alańdaýshylyq bildirdi.
Qasym-Jomart Toqaev 26 tamyzda Kabýl halyqaralyq áýejaıynda lańkestik jasaǵandardy aıyptap, terrorıstik qaýipke qarsy turý, Aýǵanstandaǵy jaǵdaıdy turaqtandyrý, álemdegi jáne Ortalyq Azııadaǵy beıbitshilik pen qaýipsizdikti nyǵaıtý úshin ǵalamdyq qoǵamdastyqtyń kúsh-jigerin jumyldyrý qajet degen pikir bildirdi.
