Qasym-Jomart Toqaev Shveıtsarııa ınvestıtsııasynyń kólemin atady
NUR-SULTAN. QazAqparat - Sońǵy 15 jylda Shveıtsarııa Qazaqstan ekonomıkasyna 24 mlrd dollar ınvestıtsııa quıdy. Bul týraly búgin Aqordada Shveıtsarııa Konfederatsııasynyń basshysy Ýlı Maýrermen kelissózderden keıingi birlesken málimdeme barysynda Qazaqstan Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Kelisssózder barysynda shveıtsarııalyq tarapqa Ortalyq Azııadaǵy transshekaralyq sýdy paıdalaný jáne sý dıplomatııasy salasyndaǵy kómegi úshin rızashylyǵymdy bildirdim. Osyǵan oraı, seriktesterimizge BUU-nyń Turaqty damý maqsattaryn júzege asyrý turǵysynda Qazaqstannyń gýmanıtarlyq saladaǵy uqsas bastamalaryn eskere otyryp, osy saladaǵy kúsh-jigerimizdi úılestirý perspektıvasyn qarastyrýdy usyndym», - dedi QR Prezıdenti.
Qasym-Jomart Toqaev Prezıdent Maýrermen Qazaqstan-Shveıtsarııa seriktestiginiń basty qurylymynda ekonomıka negizgi quramdas bolyp sanalatyndyǵy týraly ortaq pikirge kelgendikterin atap ótti.
«Qazaqstanda jáne álemde Shveıtsarııany qýatty ınnovatsııalyq óndirisi men damyǵan aýyl sharýashylyǵy bar, álemniń eń basty qarjy jáne bank ortalyqtarynyń biri retinde biledi. Óz kezeginde Qazaqstan ekonomıkalyq damýdyń turaqty ósimimen jáne óńirdegi úzdik ınvestıtsııalyq ahýalymen erekshelenedi. Qazaqstan Doing Business reıtınginde 25-orynǵa turaqtady»,- dep toqtaldy Q. Toqaev.
Memleket basshysy shveıtsarııalyq bıznes qazaqstandyq naryqta ashylǵan múmkindikterge laıyqty baǵa berip otyrǵandyǵyna da toqtaldy.
«Búginniń ózinde Shveıtsarııa Konfederatsııasy bizdiń ekonomıkamyzda ınvestıtsııa kólemi boıynsha úshinshi orynda tur jáne Qazaqstannyń iri saýda seriktesteriniń ondyǵyna kiredi. Sońǵy 15 jylda shveıtsarııalyq ınvestıtsııa kólemi 24 mlrd dollardan asyp jyǵyldy», - dedi QR Prezıdenti.
