Qasym-Jomart Toqaev shtabynyń músheleri Pavlodar oblysynda boldy

NUR-SULTAN. QazAqparat - Búgin prezıdenttikke kandıdat Qasym-Jomart Toqaevtyń respýblıkalyq qoǵamdyq shtabynyń músheleri Pavlodar oblysyna keldi, dep habarlaıdy QazAqparat Nur Otan partııasynyń baspasóz qyzmetine silteme jasap.

Jergilikti etnomádenı birlestikterdiń, úkimettik emes uıymdardyń jáne zııaly qaýym ókilderimen kezdesýde shtab basshysy Máýlen Áshimbaev ultaralyq kelisim táýelsizdiktiń alǵashqy kúninen bastap Elbasy saıasatynyń negizi sanalyp kelgenin aıtty.

- Ultaralyq kelisim, tatýlyq pen turaqtylyq, konfessııaaralyq dıalog Elbasy saıasatynyń negizi bolyp sanalady. Óziniń saılaýaldy baǵdarlamasynda sabaqtastyq qaǵıdasyna basymdyq bergen Qasym-Jomart Toqaev elimizde osy joldy ári qaraı saqtaý úshin barlyq sharany qolǵa alady, - dedi Máýlen Áshimbaev.

Sonymen qatar RQSh músheleri Qazaqstan elektrolız zaýytynyń eńbek ujymymen kezdesti. Kezdesýde shtab músheleri Q.Toqaevtyń saılaýaldy baǵdarlamasynyń basymdyqtaryna toqtaldy.

- Kandıdatymyzdyń baǵdarlamasy sabaqtastyq, ádildik jáne órleý degen úsh negizgi qaǵıdaǵa taban tireıdi. Sabaqtastyq arqyly eńbek adamdaryn qoldaý, halyqty áleýmettik qorǵaý, óndiristi damytý, kásipkerlikti qoldaý sııaqty Elbasy saıasatynyń barlyq basymdyqtaryn saqtaý kózdelip otyr. Zamanaýı qoǵamdaǵy ádildik degenimiz barlyq azamattyń zań aldyndaǵy teńdigin qamtamasyz etýge baǵyttalǵan. Qasym-Jomart Toqaev barsha azamatqa jumys isteýge, laıyqty tabys tabýǵa, sapaly bilim alyp, medıtsınalyq kómekke júginýge teń múmkindik jasaýdy jáne Elbasy bastaǵan sot júıesin reformalaýdy jalǵastyryp, quqyq qorǵaý organdarynyń qyzmetine qoǵamdyq baqylaý júrgizýdi kúsheıtýdi qolǵa alady. Órleý qaǵıdasy jetken jetistikterge toqmeıilsimeı, únemi damyp, ilgeri umtylýǵa úndeıdi, - dedi Máýlen Áshimbaev.

Oblystyq jastar bastamalaryn damytý ortalyǵynda jas býynmen kezdesken RQSh músheleri Q.Toqaevtyń baǵdarlamasynda óskeleń urpaqtyń sapaly bilim alyp, bilikti maman bolyp qalyptasýyna arnalǵan basym baǵyttardyń kórsetilgenin aıtty.

- Baǵdarlamada jastarǵa qoldaý kórsetýge erekshe kóńil bólingen. Qujatta «Prezıdent rezervi», «Jas kásipker» sııaqty jas býynǵa arnalǵan baǵdarlamalardyń qolǵa alynatyny týraly aıtylady. Bul jastardyń qyzmette ósýine jáne bıznespen aınalysýlaryna mol múmkindikter beredi, - degen Máýlen Áshimbaev jastar arasynda eriktiler qozǵalysyn damytý máselesi de baǵdarlamada qamtylǵanyn atap ótti.

Odan bólek, shtab músheleri «Pavlodar» arnaıy ekonomıkalyq aımaǵynyń qyzmetkerlerimen jáne Ekibastuz qalasynyń da jurtshylyǵymen kezdesti.