Qasym-Jomart Toqaev shtabynyń músheleri Qyzylorda oblysynyń jurtshylyǵymen kezdesti
Jergilikti temirjolshylarmen kezdesken Shtab músheleri kandıdattyń saılaýaldy baǵdarlamasynyń basymdyqtaryna toqtaldy. Sabaqtastyq, ádildik, órleý qaǵıdalaryna negizdelgen baǵdarlamada halyqtyń ál-aýqatyn arttyrý, jumys isteıtin azamattarǵa laıyqty eńbekaqy tóleý, áleýmettik qyzmet túrleriniń sapasyn jaqsartý sııaqty basym baǵyttar naqty kórsetilgen.
"Kandıdatymyz jastar máselesine de erekshe mán berip otyr. Jas urpaqtyń sapaly bilim alyp, básekege qabiletti maman bolyp qalyptasýy, turaqty jumysqa ornalasyp, turǵyn úımen qamtamasyz etilýi Qasym-Jomart Toqaevtyń basty nazarynda", - dedi shtab múshesi Gennadıı Shıpovskıh.
Sonymen birge Shtab músheleri aýyl sharýashylyǵy salasynyń qyzmetkerlerimen kezdesip, baǵdarlamada aýyl turǵyndaryna da qoldaý kórsetý máselesine basymdyq berilgenin aıtty.
"Aýyl turǵyndaryna jaǵdaı jasaý kandıdatymyzdyń negizgi basymdyqtarynyń biri. Sondyqtan Saılaýaldy baǵdarlamada osy saladaǵy kásipkerlerge qoldaý kórsetý, olardyń ónimderin ótkizýge jaǵdaı jasaý tetikteri jan-jaqty qarastyrylǵan. Sondaı-aq Qasym-Jomart Toqaev «Aýyl - el besigi» jobasy arqyly aýyldardy keshendi túrde damytýdy, turǵyndardyń ómir súrý sapasyn arttyrýdy, aımaqtardyń ınfraqurylymyn odan ári jetildirýdi qolǵa alady. Baǵdarlamada Elbasynyń agroónerkásiptik keshendi sýbsıdııalaý isin jalǵastyrý máselesi de kórsetilgen", - dedi Shtab basshysy Máýlen Áshimbaev.
Odan bólek, Qyzylorda qalasynda Qazaqstan Prezıdenttigine kandıdat Q.Toqaevty qoldaý maqsatynda jaqtastar forýmy ótti. Bir myńnan astam qoldaýshy qatysqan forýmda kandıdattyń baǵdarlamasyndaǵy negizgi basymdyqtar keńinen sóz boldy.
Sondaı-aq úgit-nasıhat jumystary aıasynda Q.Toqaevtyń senimdi ókilderi oblystyń birqatar aýdandaryna baryp, jergilikti halyqpen kezdesti.
