Qasym-Jomart Toqaev Sheıh Hamdan ben Rashıd Ál Maktýmnyń qaıtys bolýyna baılanysty kóńil aıtty

NUR-SULTAN. QazAqparat - Qazaqstan Prezıdenti Birikken Arab Ámirlikteriniń kórnekti memleket qaıratkeri jáne tanymal saıasatkeri, Qarjy jáne ónerkásip mınıstri Sheıh Hamdan ben Rashıd Ál Maktýmnyń dúnıeden ótýine baılanysty BAÁ-niń Vıtse-Prezıdenti, Premer-Mınıstri, Dýbaı ámirshisi Sheıh Muhammed ben Rashıd Ál Maktýmǵa kóńil aıtý jedelhatyn joldady, dep habarlaıdy QazAqparat Aqordanyń resmı saıtyna silteme jasap.

Qasym-Jomart Toqaev Sheıh Hamdan ben Rashıd Ál Maktýmnyń qaıtys bolǵany týraly sýyt habardy tereń kúızelispen qabyl aldy.

«Sheıh Hamdan Ámirlikterdiń damýy men órkendeýi, halqynyń ıgiligi men múddesi jolyndaǵy uzaq jyldar boıy atqarǵan minsiz qyzmetiniń arqasynda zor qurmetke ıe bolǵany barshaǵa belgili. Qazaqstan halqy da aǵańyz Sheıh Hamdan Ál Maktýmdy ekijaqty qarym-qatynastardyń nyǵaıýyna súbeli eńbek sińirgen elimizdiń naǵyz dosy, tilektes baýyry retinde árdaıym esinde saqtaıdy. Joǵary mártebeli Sheıh Muhammed, orny tolmas aýyr qaıǵyńyzǵa ortaqtasyp, búkil qazaqstandyqtar men jeke óz atymnan Sizge jáne Ámirlikter halqyna kóńil aıtamyn», – delingen jedelhatta.