Qasym-Jomart Toqaev shahmatshy qyzdyń kitaby jaıly: Asa qajet ári paıdaly
ASTANA. QazAqparat - Senat spıkeri Qasym-Jomart Toqaev óziniń Twitter akkaýntynda halyqaralyq grossmeıster Dınara Sádýaqasovanyń jaqynda jaryqqa shyqqan kitaby jóninde jyly pikir bildirdi, dep habarlaıdy QazAqparat.
«Jas shahmatshy Dınara Sádýaqasovanyń «Shahmat oınap úıreneıik» kitaby jaryq kórdi. Shahmat ónerine arnalǵan qazaq tilindegi bul tuńǵysh týyndy kópshilik qaýymǵa asa qajet ári paıdaly», - dep jazdy Qasym-Jomart Toqaev.
Senat spıkeri sondaı-aq kásibı mánerlep syrǵanaýshy Ksenııa Pankratovanyń jýyrda Úlken Almaty kólinde túsirilgen vıdeosyna qatysty pikir bildirdi.
«Almatylyq arýdyń biregeı tabıǵı qoryqtardy qoqyspen lastamaý týraly úndeýin qoldaımyn», - dep atap ótti spıker.
Eske sala keteıik, Úlken Almaty kólinde konkımen syrǵanaǵan qyzdyń vıdeosy ınternette tez taralyp, ony mıllıonnan astam adam tamashalaǵan. Vırýstyq rolık sheteldik áleýmettik toptarda da jarııalandy. Kóptegen qoldanýshylar mánerlep syrǵanaýshynyń ónerine jáne sulý tabıǵatqa tánti bolyp, tańdaı qaqty. Tipti, ol vıdeo amerıkalyq shoýdyń da qyzyǵýshylyǵyn týǵyzdy.
