Qasym-Jomart Toqaev shaǵyn bıznesi jabylyp jatqan óńirlerdi atady

NUR-SULTAN. QazAqparat - Birqatar óńir jumys istep turǵan shaǵyn jáne orta bıznes sanynyń qysqarýyna jol berip otyr. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi Aqorda baspasóz qyzmetiniń Twitter-degi paraqshasyna silteme jasap.

«Shaǵyn jáne orta bıznesti qoldaý úshin daǵdarysqa qarsy birqatar teńdessiz shara qabyldandy. Degenmen, óńirlerdiń basym bóliginde jumys istep turǵan ShOB sýbektileri sanynyń qysqarýyna jol berilgen», - dedi Memleket basshysy.

QR Prezıdentiniń dereginshe, mundaı olqylyq 8 óńirde oryn alǵan. Al Shyǵys Qazaqstan, Aqmola jáne Qostanaı oblystarynda ShOB sany qatty qysqaryp ketken.

Aıta keteıik, vıdeobaılanys arqyly ótip jatqan jıynda Úkimet 2020 jyldyń alǵashqy jarty jyldyǵyndaǵy elimizdiń áleýmettik-ekonomıkalyq damý qorytyndysy týraly esep berdi. Sondaı-aq koronavırýsqa qarsy kúreske qatysty qabyldanǵan sharalar, Memleket basshysynyń Úkimettiń aldaǵy ýaqytta atqaratyn jumysynyń negizgi baǵyttary boıynsha bergen tapsyrmalary men mindetteri qarastyryldy.

Elimizdiń áleýmettik-ekonomıkalyq damýynyń qorytyndylary men jyl sońyna deıin oryndaıtyn mindetter jóninde Premer-Mınıstr Asqar Mamın, aqsha-nesıe saıasatyna qatysty sharalar týraly Ulttyq banktiń tóraǵasy Erbolat Dosaev, elimizdegi epıdemıologııalyq ahýaldy jaqsartý jónindegi sharalar týraly Densaýlyq saqtaý mınıstri Alekseı Tsoı baıandama jasady.