Qasym-Jomart Toqaev Senat jumysyn qorytyndylady
ASTANA. QazAqparat - Parlament Senatynyń tóraǵasy Qasym-Jomart Toqaev palatanyń osy sessııadaǵy zań jobalary boıynsha jumysyn qorytyndylady, dep habarlaıdy QazAqparat.
«Búgin biz Senattyń osy sessııadaǵy zań jobalary boıynsha jumysyn aıaqtadyq. Óz máresine jetken parlamenttik maýsymdaǵy palatanyń jumysy qarqyny men kólemi jaǵynan óte aýqymdy boldy. Qabyldanǵan zańdardyń Qazaqstan qoǵamy úshin tarıhı turǵydan alǵandaǵy mańyzyn erekshe atap ótýimiz qajet. Parlament Elbasy usynǵan saıası reformalardy negizge ala otyryp, «Qazaqstan Respýblıkasynyń Konstıtýtsııasyna ózgerister men tolyqtyrýlar engizý týraly» Zań qabyldady. Elimiz óziniń áleýmettik-ekonomıkalyq jáne saıası damýynyń jańa dáýirine aıaq basty. Konstıtýtsııaǵa engizilgen ózgertýlerge sáıkes, memlekettik bılik tarmaqtarynyń ókilettikteri naqtylandy. Prezıdent ókilettikteriniń birqatary bılik tarmaqtaryna berilip, Parlament atqarýshy organdardyń qyzmetin baqylaýda jańa ókilettikterge ıe boldy. Úkimettiń Parlament aldyndaǵy jaýapkershiligi kúsheıtildi. Bul rette Prezıdenttiń memlekettik bıliktiń barlyq organdarynyń bir baǵytta bir-birine járdemdese otyryp, birin-biri tolyqtyra jumys isteý qajettigi jónindegi qoıǵan mindetine árdaıym jiti nazar aýdarý oryndy dep sanaımyn»,-dep toqtaldy Toqaev.
Onyń sózine qaraǵanda, jalpy osy sessııada Parlament palatalary Úkimetpen tyǵyz baılanysta jumys jasap, 84 zań jobasyn jan-jaqty talqylap, qabyldady. 10 zań jobasyna Senat óz túzetýlerin engizdi. Osylaısha, zań shyǵarý protsesiniń Konstıtýtsııada belgilengen tártibine sáıkes, qabyldanǵan zańdardyń joǵary sapasy qamtamasyz etildi.
«Sessııa barysynda senatorlar eki márte óńirlerde bolyp, jergilikti turǵyndarmen kezdesýlerde Elbasy Joldaýynyń negizgi erejelerin jáne Parlament qabyldaǵan zańdardy nasıhattaý jumystaryn keńinen júrgizdi. Palata otyrystarynda 70-ten asa depýtattyq saýal jarııalandy. Áriptesterimiz ortalyq memlekettik organdar basshylarynyń nazaryn túıtkildi máselelerge aýdaryp, olardyń ońtaıly sheshimin tabýǵa tikeleı atsalysty. Sonymen qatar Senattaǵy óńir tobynyń belsendi jumysyn atap ótkim keledi. Bul sessııada qabyldanǵan zańdardyń jáne mańyzdy memlekettik baǵdarlamalardyń oryndalý barysy men qoǵamda qyzý talqylaýǵa túsken ózekti máselelerdi tereń zerdeleý maqsatynda 5 ret parlamenttik tyńdaý ótkizdik»,-dedi Senat tóraǵasy.
Budan buryn habarlanǵandaı, Parlament Senatynyń tóraǵasy Qasym-Jomart Toqaev sońǵy jalpy otyrysqa qatysyp otyrǵan áriptesterine atqarǵan jumystary úshin alǵys aıtty. https://kaz.inform.kz/news/kasym-zhomart-tokaev-zhanadan-kosylatyn-senatorlardy-ne-kutip-turganyn-aytty_a3040720
«Keshe elimizde Konstıtýtsııa talaptaryna sáıkes Senat depýtattarynyń kezekti saılaýy ótti. Saılaýshylardyń senimine ıe bolyp, qatarymyzǵa jańadan qosylatyn áriptesterimiz palatanyń zań shyǵarý jumysynyń pármendiligin arttyrýǵa tyń serpin beretinine kámil senemin. Al búgin sońǵy jalpy otyrysqa qatysyp otyrǵan áriptesterge shyn júrekten alyǵysymyzdy aıtamyz jáne sizderge arnalǵan erteńgi saltanatty jıynǵa shaqyramyz»,-dep toqtaldy ol palatanyń jalpy otyrysynda.
