Qasym-Jomart Toqaev saýdııalyq Islam zertteý ortalyǵynyń basshysyn qabyldady
ASTANA. QazAqparat - QR Parlamenti Senatynyń tóraǵasy Qasym-Jomart Toqaev Saýd Arabııa Koroliniń keńesshisi, Islam zertteý ortalyǵynyń tóraǵasy hanzada Týrkı ál-Fısal ben Abdel-Azız ál-Saýdty qabyldady, dep habarlaıdy QazAqparat.
Parlament Senaty baspasóz qyzmetiniń aqparatyna qaraǵanda, mártebeli meımanmen kezdesý barysynda Toqaev eki eldiń arasyndaǵy qarym-qatynastyń oń sıpatqa ıe ekendigin, oǵan 2016 jyldyń qazanynda Qazaqstan Prezıdenti Nursultan Nazarbaevtyń Er-Rııadqa sapary tyń serpin bergenin basa atap ótti.
Spıker Qazaqstannyń saıası júıesindegi Senattyń róli jaıynda tarqata aıtyp berdi. Kezdesýge qatysshylar Sırııadaǵy ahýalǵa baılanysty da pikir almasty.
Qasym-Jomart Toqaev elordada turaqty ótip kele jatqan Astana protsesi sırııalyq daǵdarysty beıbit jolmen sheshýge salmaqty úles qosatyndyǵyn basa aıtty.
Senat tóraǵasy áńgimelesýshisine kúni keshe ǵana ótken Dástúrli jáne álemdik dinder kóshbasshylary sezi hatshylyǵy otyrysynyń qorytyndysy jaıynda da egjeı-tegjeıli aıtyp berdi.
«Biz bir ústel basyna álemdik dinder basshylary men kórnekti saıasatkerlerdi jınap, olardyń bir-birin tyńdaýyna múmkindik beremiz», - dep atap ótti Toqaev.
Osyǵan oraı Senat tóraǵasy Venada ornalasqan Korol Abdalla ben Abdel-Azız atyndaǵy Halyqaralyq dinaralyq jáne mádenıetaralyq dıalog ortalyǵymen baılanysty jalǵastyrý mańyzdylyǵyna aıryqsha toqtaldy.
Esterińizge sala ketsek, Saýd Arabııasynyń hanzadasy Túrkı ıbn Feısal ál-Saýd keshe elordadaǵy Qazaqstannyń Ulttyq mýzeıinde Saýd Arabııasynyń koroli Feısal ıbn Abdýl-Azızdiń jeke zattary qoıylǵan «Ál Feısal: Ádildik pen erlik joly» taqyrybyndaǵy kórmeniń ashylýyna qatysqan bolatyn.
