Qasym-Jomart Toqaev Respýblıka kúniniń basty qundylyǵyn atady
«Uly Abaı aıtqandaı, «aqyryn júrip, anyq basa» otyryp, eshqandaı dúrbeleńsiz táýelsizdikke qol jetkizdik. Eń bastysy – biz babalar ańsaǵan azat elge aınaldyq. Álem moıyndaǵan, qurmet tutqan memleket atandyq. Munyń barlyǵy – búkil halqymyzdyń ortaq eńbeginiń jemisi. Respýblıka kúniniń basty qundylyǵy – osynda», - dedi Memleket basshysy.
Sondaı-aq Q.Toqaev Tuńǵysh Prezıdent Nursultan Nazaprbaevtyń elimiz egemendigine qosqan úlesi týraly aıtty.
«Biz ádilettilik týraly aıtsaq, Tuńǵysh Prezıdent Nursultan Nazarbaevtyń elimizdiń egemendikke jetýine qosqan eleýli úlesi jóninde aıtýymyz kerek. Túptep kelgende, táýelsizdikke qalaı qol jetkizip, baıandy ete alǵanymyz mańyzdy. Ókinishke qaraı, bul kún elimizde biraz jyl óz deńgeıinde atap ótilgen joq. Biraq, tarıhı ádildik ornady», - dedi Prezıdent.
«Men Ulytaýda ótken alqaly jıynda Respýblıka kúnine ulttyq mereke mártebesin qaıtarýdy usyndym. Ony Qazaqstannyń basty meıramy retinde atap ótý týraly bastama kóterdim. Bul bastama halyqtyń keń qoldaýyna ıe bolyp, tıisti zańǵa ózgeris engizildi.
Bıyldan bastap Respýblıka kúni – ulttyq mereke. Endi bul meıramdy kúlli el bolyp jańa mazmunda atap ótetin bolamyz. Qaıta jańǵyrǵan Respýblıka kúni – bul halqymyzdyń rýhyn kóterip, eldigimizdi nyǵaıta túsetin asa mańyzdy tarıhı qadam. Sondyqtan, osy mereıli kún azamattarymyzdyń ózara túsinistigin, tutas ultymyzdyń erkin ómirge jáne derbes damýǵa umtylysyn pash etetin mereke bolmaq», - dedi Q.Toqaev.
Memleket basshysy atap ótkendeı, «respýblıka» sózi latyn tilinde «ortaq is» degen maǵyna beredi. Al respýblıka óz isine jaýapty azamattardyń ortaq is-áreketiniń arqasynda qurylady. Óıtkeni, azamattar – memlekettiń arqaýy. Azamattary bolmasa, memleket te bolmaıdy.
