Qasym-Jomart Toqaev Reseı Prezıdentiniń kómekshisin qabyldady
Memleket basshysy eki eldiń uzaq merzimdi ulttyq múddelerin qamtamasyz etý isindegi Qazaqstan men Reseı áriptestiginiń jáne odaqtastyǵynyń mańyzdylyǵyn atap ótti.
«Qazaqstannyń Tuńǵysh Prezıdenti - Elbasy Nursultan Nazarbaev eki el arasyndaǵy qatynastardyń basqalarǵa úlgi sanalatynyn árdaıym aıtyp otyrady. Sondyqtan, Memleket basshysy retindegi meniń mindetim - bizdiń kóshbasshylarymyz Nursultan Ábishuly Nazarbaev pen Vladımır Vladımırovıch Pýtın negizin qalaǵan ekijaqty yntymaqtastyqty damytýǵa qosymsha serpin berý», - dedi Qasym-Jomart Toqaev.
Reseı Federatsııasyna jasaıtyn aldaǵy resmı saparyna baılanysty Memleket basshysy joǵary deńgeıdegi kelissózder barysynda bilim berý jáne ǵylym salasynyń ózekti máseleleri talqylanatynyn aıtty.
«Biz yntymaqtastyqty keńeıtý aıasynda bilim berý máselelerin de talqylaımyz dep oılaımyn. Búgingi eń bastysy - bilim berý salasyna ınvestıtsııa tartý», - dedi Qazaqstan Prezıdenti.
A. Fýrsenko Qasym-Jomart Toqaevqa óziniń Qazaqstanǵa sapary barysynda ótkizgen kezdesýleri jóninde málimet berdi.
«Biz syndarly ári keleli kelissózder júrgizdik, Ulttyq bıotehnologııa ortalyǵyna, Nazarbaev Ýnıversıtetine, Parlament Senatyna bardyq. Búginde elderimiz arasynda ǵylym salasyndaǵy yntymaqtastyq meılinshe tabysty júzege asyrylýda. Bul baǵytta ortaq basymdyqtar men damytýǵa qajetti áleýetimiz bar», - dedi Reseı Federatsııasy Prezıdentiniń kómekshisi.