Qasym-Jomart Toqaev: Problemalar týraly ádil ári ashyq aıtylýy kerek
NUR-SULTAN. QazAqparat – Memleket basshysy Qasym-Jomart Toqaev Qazaqstan realıstik jáne optımıstik stsenarıı boıynsha qatań shekteý sharalarynan bıyldyń ózinde qutyla alatyndyǵyn aıtty, dep habarlaıdy QazAqparat tilshisi.
«Sóz sońynda bizdiń eldiń azamattarymen kommýnıkatsııa men keri baılanys ornatýdyń mańyzdylyǵyn erekshe atap ótkim keledi. Praktıka kórsetip otyrǵandaı, pandemııamen kúrestiń tabysty nátıjesi halyqtyń qabyldanǵan sheshimderi men sharalaryna degen senimine baılanysty. Senim óz kezeginde azamattardyń bıliktiń áreketin túsinip, soǵan atsalysýyna táýeldi. Azamattarmen turaqty dıalogty jalǵastyryp, problemalar týraly ádil ári ashyq aıta bilý kerek. Sol arqyly sheshimder de usynylýy tıis», - dedi Prezıdent koronavırýs indetiniń ekinshi kezeńine daıyndyq máseleleri boıynsha keńeste sóılegen sózinde.
Prezıdenttiń aıtýynsha, bıznes ókilderi men azamattar ahýal sanıtarııalyq jáne aldyn alý sharalaryn saqtaýǵa baılanysty ózgeretinin túsingen abzal.
«Realıstik jáne optımıstik stsenarıı boıynsha biz qatań shekteý sharalarynan bıyldyń ózinde qutyla alamyz. Pandemııamen birge kúresken durys. Úkimet pen aımaq ákimderi men tapsyrǵan mindetterdiń báriniń qaltqysyz oryndalýyn qamtamasyz etýi kerek», - dedi Prezıdent.
