Qasym-Jomart Toqaev pen Sooronbaı Jeenbekovtiń kelissózderinen keıin birqatar qujatqa qol qoıyldy
BІShKEK. QazAqparat – Bishkekte Qazaqstan Prezıdenti Qasym-Jomart Toqaev pen Qyrǵyzstan Prezıdenti Sooronbaı Jeenbekovtiń kelissózderinen keıin eki el úkimetteri arasynda birqatar qujatqa qol qoıyldy, dep habarlaıdy QazAqparat tilshisi.
Qazaqstan Respýblıkasy Prezıdenti Qasym-Jomart Toqaev pen Qyrǵyz Respýblıkasynyń Prezıdenti Sooronbaı Jeenbekov eki el memleket basshylarynyń Birlesken deklaratsııasyna qol qoıdy.
Qazaqstan men Qyrǵystannyń Joǵary memleketaralyq keńesiniń: «Qazaqstandyq-qyrǵyz ekijaqty yntymaqtastyǵyn odan ári damytý týraly», «Qazaqstandyq-qyrǵyz memlekettik shekarasyndaǵy ótkizý pýnkteri týraly», «Logıstıka salasyndaǵy yntymaqtastyq týraly» jáne «Qazaqstan men Qyrǵyzstan arasyndaǵy mádenı-gýmanıtarlyq yntymaqtastyq týraly» sheshimderge qol qoıyldy.
Kóshi-qon salasyndaǵy yntymaqtastyq týraly Qazaqstan Respýblıkasy men Qyrǵyz Respýblıkasy arasyndaǵy úkimetaralyq kelisim jasaldy.
Qazaqstan Respýblıkasy Úkimeti men Qyrǵyz Respýblıkasy Úkimeti arasynda ««Qarasý-avtojol» men «Aq-Tilek-avtojol» ótkizý beketteri arasynda jańa kópir salý jáne qoldanystaǵy kópirdi qaıta jańartý boıynsha birlesken is-qımyl týraly» kelisimge qol qoıyldy.
Sonymen qatar, Qazaqstan Qarjy mınıstrligi men Qyrǵyzstan Úkimeti janyndaǵy ekonomıkalyq qylmystarmen kúres jónindegi memlekettik qyzmet arasynda ekonomıkalyq jáne qarjylyq qylmystarmen kúrestegi yntymaqtastyq týraly kelisimge qol qoıyldy.
Budan bólek, eki el qorǵanys salasynyń vedomstvolary arasynda áskerı aerodromdarda áskerı áýe kemelerin qabyldaý, aerodromdyq-tehnıkalyq qamatasyz etý jáne kúzetý týraly kelisimge qol qoıyldy.
Densaýlyq saqtaý salasynda eki eldiń densaýlyq saqtaý mınıstrlikteri arasyndaǵy yntymaqtastyq týraly kelisim bekitildi.
Qazaqstan Saýda jáne ıntegratsııa mınıstrligi men Qyrǵyzstan Úkimeti janyndaǵy ekologııalyq jáne tehnıkalyq qaýipsizdik jónindegi memlekettik ınspektsııa arasynda metrologııalyq qadaǵalaý júrgizý kezinde tájirıbe almasý salasyndaǵy memorandýmǵa qoıyldy.
«Kazakh Invest» ulttyq kompanııasy men Qyrǵyzstannyń ınvestıtsııalardy ilgeriletý jáne qorǵaý agenttigi arasynda ınvestıtsııalyq jobalardy ilgeriletý men júzege asyrý boıynsha kelisim bekitildi.
