Qasym-Jomart Toqaev pen Sharl Mıshel saıası dıalog qarqynyn kúsheıtýge ýaǵdalasty

ASTANA. QazAqparat – Qazaqstan Eýropalyq keńes prezıdenti Sharl Mısheldiń saparyna aıryqsha mán beredi. Bul týraly búgin Aqordada Eýropalyq keńestiń prezıdenti Sharl Mıshelmen kelissózderden keıingi baspasózge arnalǵan málimdeme barysynda QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Búgin Eýropalyq keńes prezıdenti Sharl Mıshel Qazaqstanǵa alǵashqy resmı saparmen kelip otyr. Bul - biz úshin úlken mártebe. Osy rette meniń shaqyrýymdy qabyl alǵany úshin qurmetti qonaǵymyzǵa shynaıy rızashylyǵymdy bildiremin. Kelesi jyly Qazaqstan men Eýropalyq odaq arasynda dıplomatııalyq qatynas ornaǵanyna 30 jyl tolady. Sondyqtan Sharl Mıshel myrzanyń sapary osy mereıli meje qarsańynda ótip otyrǵany erekshe qýantady. Biz bul saparǵa aıryqsha mán beremiz», - dedi Memleket basshysy.

Qasym-Jomart Toqaev Prezıdent Mısheldiń Qazaqstan men Eýropalyq odaq arasyndaǵy yntymaqtastyqty nyǵaıtýǵa qosyp otyrǵan súbeli úlesin joǵary baǵalaıtynyn aıtty.

«Biz ekijaqty yqpaldastyǵymyzdy jańa sapaly deńgeıge kóterý úshin keń aýqymdy ári mazmundy kelissózder júrgizdik. Kezdesýimiz ózara senim jáne túsinistik rýhynda ótti.

Biz mazmundy saıası dıalogtyń qarqynyn odan ári kúsheıtemiz dep ýaǵdalastyq. Sondaı-aq keńeıtilgen seriktestik jáne yntymaqtastyq týraly kelisim aıasyndaǵy strategııalyq áriptestigimizdi nyǵaıtýǵa nıetti ekenimizdi rastadyq», - dedi QR Prezıdenti.

Foto: akorda.kz