Qasym-Jomart Toqaev pen Mýn Chje In Qazaqstan-Koreıa bıznes-forýmyna qatysty
«Bul sapar elderimizdiń yntymaqtastyǵyn odan ári keńeıtip, damytýǵa tyń serpin beretinine senimdimin. Sonymen qatar, búgingi sharany uıymdastyrýǵa zor úles qosqany úshin Koreıa halyqaralyq saýda qaýymdastyǵyna alǵys aıtamyn. Elder arasynda erekshe dostyq qatynas ornaǵan, al ekijaqty saýda-ekonomıkalyq áriptestik joǵary ońtaıly qarqynmen sıpattalyp otyr. Qazaqstan men Koreıa arasynda ınvestıtsııany qorǵaý týraly kelisimge 1996 jyly qol qoıylǵan edi. Osy jyldar ishinde Ońtústik Koreıa Qazaqstan ekonomıkasyna 7 mlrd AQSh dollaryna tarta ınvestıtsııa quıdy», - dedi Qasym-Jomart Toqaev.
Osy oraıda Prezıdent Koreıa Respýblıkasy Azııa óńirinde Qazaqstannyń eń iri saýda áriptesteriniń biri sanalatynyn atap ótti.
«2017 jylmen salystyrsaq, tek 2018 jyly taýar aınalymy kólemi 2 eseden astam deńgeıde ósip, 4 mlrd dollarǵa jýyqtady. Bizdiń elder birlesken jobalardy ekonomıkanyń túrli sektorlarynda júzege asyryp jatyr. Bul turǵyda qurylys, ınfraqurylym, aýyl sharýashylyǵy, mashına jasaý, qarjy, densaýlyq saqtaý jáne basqa da salalar qamtyldy», - dedi Memleket basshysy.
Prezıdent osy yntymaqtastyqtyń áleýeti áli de joǵary ekenin qadap aıtty.
«Búgin biz birlesken jobalarǵa qatysty ekspozıtsııalardy qarap shyqtyq. Osy oraıda eki eldiń saýda-ekonomıkalyq ózara is-qımylynyń lokomotıvi bolýǵa qaýqarly óte úlken jobanyń jetispeıtini baıqalady», - dedi Q. Toqaev.
Osy oraıda Memleket basshysy búginde Qazaqstanda iskerlik bastamalar men ınvestıtsııalardy júzege asyrý úshin qolaıly jaǵdaılar jasalǵanyn atap ótti.
Bıznes-forýmǵa eki el tarapynan 500-ge tarta bıznes ókili qatysýda. Onda mashına jasaý, medıtsına, hımııa ónerkásibi, qurylys jáne basqa da basymdyqty salalar talqylandy. Forým barysynda 3,2 mlrd AQSh dollary somasyndaǵy kelisimge qol qoıyldy.
