Qasym-Jomart Toqaev pen Djo Baıdenniń qashan jáne qalaı kezdesetini belgili boldy
AQSh-tyń ulttyq qaýipsizdik máseleleri jónindegi keńesshisi Djeık Sallıvan kelesi aptada álem kóshbasshylary BUU Bas Assambleıasy 78-sessııasynyń ashylýyna jınalatynyn málimdedi.
AQSh Prezıdenti Djo Baıden sársenbige deıin Nıý-Iorkte bolyp, bul múmkindikti birqatar másele boıynsha AQSh-tyń múddesi men qundylyqtaryn ilgeriletý úshin paıdalanýǵa tyrysady.
Seısenbi kúni Djo Baıden Bas Assambleıaǵa óziniń jyl saıynǵy joldaýyn jarııalaıdy. AQSh prezıdenti ózi jáne onyń ákimshiligi amerıkalyq kóshbasshylyq ustanymdaryn ilgeriletý úshin qabyldaǵan qadamdary týraly aıtady. Olar álemdegi meılinshe ózekti máselelerdi sheshý baǵytynda ózge memlekettermen áriptestikke negizdelgen.
Keńesshi AQSh prezıdentiniń Ortalyq Azııanyń bes memleketi: Qazaqstan, Qyrǵyz Respýblıkasy, Ózbekstan, Tájikstan jáne Túrikmenstan basshylarymen kezdesýi josparlanǵanyn atap ótti.
Djeık Sallıvannyń aıtýynsha, «S5+1» prezıdentterdiń tarıhtaǵy tuńǵysh sammıti bolmaq. Ol is júzine 2015 jyly bastalǵan bolatyn, sodan beri tek kúsheıip keledi jáne memleketter kóshbasshylary deńgeıine jetti.
Alǵashqy sammıt kóshbasshylarǵa aımaqtyq qaýipsizdikten bastap, saýda jáne ózara is-áreketter, klımattyń ózgerýi men basqarýdy jaqsartý jáne zań ústemdigin arttyrýǵa baǵyttalǵan reformalarǵa deıingi birqatar máseleni talqylaýǵa múmkindik beredi.
Prezıdent memleket jáne úkimet basshylaryn dástúrli túrde qabyldaý rásimin ótkizip, jeke kelissóz júrgizýge múmkindik bolady.
Buǵan deıin habarlaǵanymyzdaı, Prezıdent Qasym-Jomart Toqaevtyń Nıý-Iork qalasyndaǵy jumys sapary bastaldy. Sapar barysynda Memleket basshysy BUU Bas Assambleıasy 78-sessııasynyń Jalpy debatynda sóz sóıleıdi, sondaı-aq «Ortalyq Azııa – AQSh» sammıtine qatysady. Budan bólek, Prezıdent birqatar memlekettiń basshylarymen, halyqaralyq uıymdardyń jáne transulttyq kompanııalardyń jetekshilerimen kezdesý ótkizedi dep josparlanyp otyr.
