Qasym-Jomart Toqaev: Parlamentaralyq forým halyqtarymyzdyń múddesine saı keletin ýaqytyly bastama
«Qurmetti forýmǵa qatysýshylar! Qonaqjaı qazaq jerine basqan qadamdaryńyzǵa shyn júrekten qutty bolsyn aıtamyn. Ortalyq Azııa memleketteriniń tuńǵysh Parlamentaralyq forýmynyń bizdiń halyqtarymyz úshin erekshe qasıetti sanalatyn Túrkistan qalasynda ótýinde tereń sımvoldyq mán jatyr. Bizdi taǵdyrdyń ózi tyǵyz baılanystyrady. Túbi bir tarıhymyz, rýhanı týystyǵymyz ben ǵasyrlar boıǵy mádenı-gýmanıtarlyq baılanystarymyz da bizdi biriktiredi. Elderimizdiń arasyndaǵy uzaqmerzimdi ózara qarym-qatynastardyń qazirgi kúni tabysty jalǵasyn tabýy da osynaý myzǵymas irgetasymyzdyń arqasy», - delingen Memleket basshysynyń hatynda.
«Sońǵy jyldary bizdiń óńirimizde jan-jaqty yntamaqtastyq erekshe qarqynmen damyp jatqanyn aıryqsha atap ótkim keledi. Saıası dıalogtyń joǵary deńgeıi, ózara saýdanyń aıtarlyqtaı ósýi, ekonomıkanyń basym salalaryndaǵy kooperatsııanyń qarqyn ala túsýi jáne taǵy basqalary osynyń aıǵaǵy. Bul úderiste óńirlik ózara árekettestiktiń negizgi baǵyttaryn aıqyndaıtyn Ortalyq Azııa kóshbasshylarynyń júıeli túrdegi Konsýltatıvtik kezdesýleri erekshe orynǵa ıe», - deıdi Prezıdent.
Sondaı-aq Qasym-Jomart Toqaev Parlamentaralyq forýmdy ótkizý bastamasy ýaqytyly ekenin ári halyqtardyń túpkilikti múddesine jaýap beretinin atap ótedi.
«Kúrdeli geosaıası ahýal men álemdik ekonomıkanyń týrbýlenttiligi jaǵdaıynda parlamenttik dıplomatııanyń mańyzy artyp otyr. Parlamentshiler qyzmeti ekijaqty kelisimderdi zańnamalyq qamtamasyz etýde, dostyq pen tatý kórshilik ahýalynyń saqtalýyna, óńirdegi ózara tıimdi yntymaqtastyqty nyǵaıtýda úlken ról atqarady», - delingen Prezıdent hatynda.
Budan bólek, Memleket basshysy búgingi kúni óńir memleketteri úshin ekonomıkalyq kooperatsııany kezeńimen tereńdetýdiń mańyzyna toqtalyp ótedi. Bul rette Prezıdent óńirlik jáne shekaramańy saýda-sattyǵyn nyǵaıtý, kólik-tranzıttik saladaǵy áriptestikti damytý, jańa zamanaýı jobalardy júzege asyrý máselesine toqtalady.
«Parlamentaralyq forýmdy ótkizý halyqtarymyzdyń múddesine saı keletin ýaqtyly bastama. Búgingi shıelenisken geosaıası ahýal jáne qubylmaly álemdik ekonomıka jaǵdaıynda parlamenttik dıplomatııanyń mańyzy aıtarlyqtaı artyp otyr. Ekijaqty kelisimderdi qamtamasyz etýde, dostyq jáne tatý kórshilik qatynasty saqtaýda, óńirdegi ózara tıimdi yntymaqtastyqty nyǵaıtýda parlamentshilerdiń qyzmeti aıryqsha ról atqarady. Qazirgi tańda bizdiń elderimiz úshin ekonomıkalyq kooperatsııany dáıekti túrde damytýdyń máni zor. Bul rette óńirlik jáne shekara mańyndaǵy saýda-sattyqty arttyrýǵa, kólik-tranzıttik saladaǵy seriktestikti damytýǵa, jańa birlesken jobalardy qolǵa alýǵa basa mán bergen abzal. Ortalyq Azııanyń ortaq rýhanı murasyn saqtaý jáne birtutas mádenı-tarıhı keńistigin qalyptastyrý úshin gýmanıtarlyq yntymaqtastyqty jańa qarqynmen jandandyrý mańyzdy», – delingen Qasym-Jomart Toqaevtyń úndeýinde.
