Qasym-Jomart Toqaev ózi bilim alǵan joǵary oqý orny týraly aıtyp berdi
NUR-SULTAN. QazAqparat - QR Prezıdenti Qasym-Jomart Toqaev ózi bilim alǵan Máskeý memlekettik halyqaralyq qatynastar ınstıtýty týraly pikir bildirdi, dep habarlaıdy QazAqparat.
«Mır» telearnasyna bergen suhbatynda Prezıdentke atalǵan oqý ornyna 75 jyl tolǵany týraly aıtylyp, Memleket basshysynyń stýdenttik ómiri týraly suraq qoıyldy.
«Máskeý memlekettik halyqaralyq qatynastar ınstıtýty (MMHQI) - shynynda da biregeı oqý orny. Ol Reseıde ǵana emes, kóptegen postkeńestik elderde, sonyń ishinde Qazaqstanda da tanymal. Batys ta bul ınstıtýttan habardar, sebebi onyń túlekteri Birikken Ulttar Uıymy men ózge de halyqaralyq uıymdarda jumys istep júr. Onyń rektory, akademık Anatolıı Torkýnovtyń kúsh-jigerimen bul JOO stýdentterdiń kostıým men galstýkte júrýi syndy dástúrli jáne konservatıvti qaǵıdalaryn ustanýdy úılestire aldy. Biraq, munyń bári artta qaldy, qazirgi stýdentter galstýk taqpaıtyn da shyǵar. Biz oqyǵan jyldary galstýkpen júrý mindetti edi», - dep eske aldy Qasym-Jomart Toqaev.
Sonymen birge, Prezıdent 2017 jyly MMHQI túlekteriniń kezekti forýmyn Qazaqstan astanasynda ótkizýdi uıymdastyrýǵa kómekteskenin aıtty.
«Sol kezde bizge ınstıtýttyń túlekteri - tanymal saıası, qoǵam qaıratkerleri, dıplomattar kelgen edi. Sondyqtan, mundaı forýmdardy ótkizý óte mańyzdy. Meniń bilýimshe, forým ótkizý dástúri áli de jalǵasyn tabady jáne men de bul dástúrdi qoldaımyn», - dedi Prezıdent.
