Qasym-Jomart Toqaev Ózbekstandaǵy Qazaqstan jylyn ashty
NUR-SULTAN. QazAqparat - Ózbekstandaǵy Qazaqstan jylynyń saltanatty ashylýy aıasynda Tashkentte gala-kontsert ótip jatyr, dep habarlaıdy «QazAqparat» HAA tilshisi.
Merekelik shara Qazaqstan men Ózbekstan Prezıdentteri Qasym-Jomart Toqaev pen Shavkat Mırzıeevtiń qatysýymen Ózbekstannyń halyqaralyq forýmdar saraıynda ótýde. Ózbekstan basshysynyń Feısbýktegi resmı paraqshasynda is-shara tikeleı efırden kórsetilýde.
Gala-kontsert bastalar aldynda Qazaqstan men Ózbekstan Prezıdentteri quttyqtaý sóz sóıledi. Qasym-Jomart Toqaev pen Shavkat Mırzıeev Ózbekstandaǵy Qazaqstan jylyna bastaý berdi.
Elimizdiń óner sheberleri men shyǵarmashyl jastarynyń gala-kontsertin QR Mádenıet jáne sport mınıstrligi uıymdastyrdy. Oǵan KSRO jáne Qazaqstannyń halyq ártisi Álibek Dinishev, Qazaqstannyń halyq ártisi, Qazaqstannyń Eńbek Eri Aıman Musaqojaeva, Qazaqstannyń eńbek sińirgen qaıratkerleri Maıra Muhamedqyzy, Medet Shotabaev, Nurlan Bekmuhambetov jáne halyqaralyq konkýrstardyń laýreaty Marııa Mýdrıak keldi. Sonymen birge kontsertte «Daryn» memlekettik jastar syılyǵynyń ıegeri Dımash Qudaıbergen óner kórsetedi.
Qazaqstandyq ártister ózbek kórermenderine M.Tólebaevtyń «Birjan-Sara» operasynyń úzindilerin, «Astana» balet teatrynyń horeografııalyq kompozıtsııalaryn, «Saltanat» memlekettik bı ansambliniń, Q. Qojamııarov atyndaǵy memlekettik respýblıkalyq akademııalyq uıǵyr mýzykalyq komedııa teatry men memlekettik respýblıkalyq akademııalyq koreı mýzykalyq komedııa teatrynyń ónerin usynady.
Aıta keteıik, 14-15 sáýir kúnderi Qazaqstan basshysy Q.Toqaev Ózbekstan Prezıdenti Shavkat Mırzıeevtiń shaqyrýymen atalmysh elde memlekettik saparmen boldy. Onyń qorytyndysy boıynsha qos el Prezıdenti Birlesken málimdeme jasady. Birqatar ekijaqty qujattarǵa qol qoıyldy. Júrgizilgen kelissózderdiń qorytyndysy boıynsha Qasym-Jomart Toqaev pen Shavkat Mırzıeev BAQ ókilderi úshin brıfıng ótkizdi.
