Qasym-Jomart Toqaev opera ánshisi Shahımardan Ábilovti 70 jasqa tolǵan mereıtoıymen quttyqtady
NUR-SULTAN. QazAqparat - Qazaqstan Prezıdenti Qasym-Jomart Toqaev opera ánshisi, Qazaqstannyń eńbek sińirgen ártisi Shahımardan Ábilovtiń 70 jasqa tolǵan mereıtoıyna oraı, quttyqtaý hatyn joldady, dep habarlaıdy QazAqparat Memleket basshysynyń baspasóz hatshysy Berik Ýálıge silteme jasap.
«Siz álemdik jáne otandyq klassıkterdiń shyǵarmalaryn ózińizge tán sheberlikpen oryndap, óner jolyndaǵy bıik belesterdi baǵyndyryp, jurtshylyqtyń ystyq yqylasy men shynaıy qurmetine bólenip kele jatqan shyǵarmashylyq ıesisiz.
Opera ánshisi retinde ózińizdiń dara daýysyńyz ben oryndaýshylyq sheberligińiz arqyly uly Abaıdyń án murasynyń tereń ıirimderin ónersúıer qaýymǵa jetkizdińiz. Ulaǵatty ustaz retinde jastardyń qabilet kózin ashyp, bıikterge samǵaýyna qosqan úlesińiz de óz aldyna bir tóbe», – dep Memleket basshysy quttyqtaý hatynda atap ótti.
Sońynda Qasym-Jomart Toqaev mereıtoı ıesine zor densaýlyq, uzaq ta baqytty ǵumyr, sondaı-aq, otbasyna amandyq pen ıgilikter tilep, alǵysyn joldady.
