Qasym-Jomart Toqaev Mıýnhen konferentsııasyna qatysty
ASTANA. QazAqparat - Qazaqstan Parlamenti Senatynyń tóraǵasy Qasym-Jomart Toqaev Memleket basshysynyń tapsyrmasy boıynsha 15-17 aqpanda Mıýnhen qaýipsizdik konferentsııasyna qatysty. Bul týraly QazAqparat Senattyń baspasóz qyzmetine silteme jasap habarlaıdy.
Tanymal álemdik saıasatkerler, sarapshylar men qoǵam qaıratkerleri bas qosatyn bedeldi forýmda dástúr boıynsha jahandyq jáne aımaqtyq qaýipsizdiktiń eń mańyzdy máseleleri talqylandy. Taıaý Shyǵys, Balkan men Kavkazda beıbitshilikti qamtamasyz etýdiń keleshegi pikirsaıystyń basty nazarynda boldy. Jekelegen sessııalar halyqaralyq saýda, qarý-jaraqty baqylaý, klımat ózgeristeri men kıbertehnologııanyń qaýipsizdik jaǵdaıy áserine arnaldy.
Konferentsııada memleketter men úkimetterdiń basshylary, parlamentter tóraǵalary, halyqaralyq uıymdardyń kóshbasshylary, yqpaldy sarapshylar sóz sóıledi. Sharaǵa memleketter men úkimetterdiń 35 basshysy, 50 syrtqy ister mınıstri, 30 qorǵanys mınıstrin qosqanda barlyǵy 600-den astam delegat qatysty.
Senat tóraǵasy birqatar paneldik sessııalarǵa jáne «Transulttyq qaýipsizdik» taqyrybyna arnalǵan dóńgelek ústelge qatysty. Múddeli pikirtalastyń jalpy qorytyndysy boıynsha qazirgi kezde ortalyǵy Birikken Ulttar Uıymy bolyp tabylatyn halyqaralyq tártip barsha adamzattyń birlesken jaýabyn talap etetin asa mańyzdy qaterlermen betpe-bet kelip otyrǵany moıyndaldy.
