Qasym-Jomart Toqaev Mıýnhen konferentsııasyna qatysty
ASTANA. QazAqparat - Qazaqstan Respýblıkasy Parlamenti Senatynyń Tóraǵasy Qasym-Jomart Toqaev Memleket basshysynyń tapsyrmasy boıynsha Mıýnhen qaýipsizdik konferentsııasyna qatysty, dep habarlaıdy QR Parlamenti Senatynyń baspasóz qyzmeti.
Baspasóz málimetterine qaraǵanda, 16-18 aqpanda ótken forýmǵa álemdik deńgeıdegi saıasatkerler men qoǵam qaıratkerleri qatysyp, halyqaralyq qaýipsizdiktiń mańyzdy máselelerin talqylady. Jekelegen sessııalar Eýropa Odaǵynyń Reseı jáne AQSh-pen ózara is-qımylyna, Taıaý Shyǵys pen Koreı túbegindegi shıelenisterdi retteýge arnaldy. Kıber qaýipsizdik, energetıka jáne azyq-túlik qaýipsizdiginiń ózekti máseleleri, Arktıkadaǵy jaǵdaı jóninde taqyryptyq dóńgelek ústelder boldy.
Konferentsııada memleketter men úkimetterdiń basshylary, parlamentterdiń tóraǵalary men halyqaralyq uıymdardyń jetekshileri, yqpaldy qoǵam qaıratkerleri men taldaý ortalyqtarynyń ókilderi sóz sóıledi. Sharaǵa barlyǵy 500-den astam adam qatysty. Q.Toqaev forým aıasynda birqatar kezdesýler ótkizdi.
Senat Tóraǵasynyń BUU Qorshaǵan orta jónindegi baǵdarlamasynyń Atqarýshy dırektory Erık Solheımmen kezdesýinde Qazaqstannyń BUU qurylymdarymen ózara is-qımyl máseleleri talqylandy. Q.Toqaev ıAdrolyq qarýdy joıý jónindegi halyqaralyq kampanııanyń (ICAN) Atqarýshy dırektory Beatrıs Fındi uıymǵa Nobel beıbitshilik syılyǵynyń tabys etilýimen quttyqtady. B.Fın Qazaqstannyń jappaı qyryp-joıý qarýynan azat álem qurýdaǵy úlesin joǵary baǵalady, sondaı-aq qarýsyzdandyrý salasyndaǵy halyqaralyq baǵdarlamany iske asyrýǵa ózara is-qımyl qajettigin atap ótti.
Schaeffler AG kontserni baıqaýshylar keńesiniń tóraǵasy Georg Shafflermen jáne Schaeffler AG-tyń Ortalyq jáne Shyǵys Eýropa, Taıaý Shyǵys jáne Afrıka boıynsha atqarýshy bas dırektory Raıner Lındnermen tehnologııalyq jáne ınvestıtsııalyq yntymaqtastyqtyń keleshegi týraly áńgime órbidi. Senat Tóraǵasy ekonomıkany tehnologııalyq turǵyda jedel jańǵyrtý Qazaqstandaǵy keshendi reformanyń mańyzdy quramy ekenine nazar aýdara kelip, nemis bıznesin bizdiń elimizdiń aýmaǵyndaǵy birqatar iri jobalardy iske asyrýǵa qatysýǵa shaqyrdy.
