Qasym-Jomart Toqaev Mıýnhen qaýipsizdik konferentsııasyna qatysýda

Mıýnhen qaýipsizdik konferentsııasynyń 56-shy otyrysy 2020 jyldyń 14-16 aqpany aralyǵynda ótedi. Búginde birqatar elderdiń basshylary forýmǵa qatysatyndyqtaryn rastady.

Atalǵan is-sharaǵa 40-qa jýyq memlekettiń basshylary, 100-den astam syrtqy ister jáne qorǵanys mınıstrleri, halyqaralyq qatynastar salasyndaǵy bedeldi sarapshylar, Eýrokomıssııa ókilderi, sondaı-aq Eýropalyq parlament depýtattary qatysýda.

Konferentsııa kúntártibinde «EO men NATO bolashaǵy», «Kıberqaýipsizdik», «Densaýlyq saqtaý máseleleri», «Saýda soǵystary men sanktsııalar», «Jalǵan aqparat, nasıhat pen kúmándi jańalyqtar», «Qytaı róli men EO-nyń Reseımen jáne AQSh-pen qatynasy», «Taıaý Shyǵystaǵy ahýal» taqyryptary talqylanbaq.

Aıta keteıik, jyl saıyn forýmǵa álemniń 70 elinen 400-600 adam qatysyp keldi. Olardyń arasynda memleket jáne úkimet basshylary, áskerı ári saıası kóshbasshylar, mınıstrler kabınetiniń músheleri, parlament depýtattary, ǵalymdar, saıasattanýshylar, azamattyq qoǵam ókilderi qamtyldy. 1990 jyldan beri konferentsııaǵa Reseı men Shyǵys Eýropanyń elderi, Qytaı, Úndistan, Japonııa ókilderi shaqyrtý alýda.

Sharanyń taqyryptary únemi ózgeriske ushyraıtyn qaýipsizdik saıasaty talaptaryna sáıkes túrlenip turady. Mıýnhen konferentsııasyn ótkizýdiń alǵashqy jyldarynda birinshi kezekte Eýro-Atlantıkalyq aımaqtaǵy qaýipsizdik qaterlerin boldyrmaýǵa nazar aýdaryldy. Alaıda, keıinnen jańa aýmaqtar men basqa da máseleler kún tártibine engendikten, konferentsııanyń múddeler spektri keńeıe tústi.

Osy oraıda atalǵan Mıýnhen konferentsııasy qaýipsizdik saıasaty máseleleri boıynsha mańyzdy forým bolyp tanyldy. Sharanyń árbir sessııasy joǵary laýazymdy qaıratkerlerdiń basyn biriktirip, qaýipsizdiktiń aǵymdaǵy ári bolashaq problemalaryn egjeı-tegjeıli talqylaýdy eskeredi.

Budan buryn habarlanǵandaı, Memleket basshysy Qasym-Jomart Toqaevtyń Mıýnhen qalasyna (Germanııa) jumys saparymen baratyny aıtylǵan edi.