Qasym-Jomart Toqaev: Memleket qaýipsizdigin qorǵaý - Otan kúzetindegi ár azamattyń paryzy
NUR-SULTAN. QazAqparat - Búgin Aqordada QR Prezıdenti Qasym-Jomart Toqaev Otan qorǵaýshylar kúnine oraı minsiz áskerı qyzmetimen, eren eńbegimen daralanǵan azamattardy marapattap jatyr, dep habarlaıdy QazAqparat tilshisi.
"Qurmetti sardarlar men sarbazdar! Barshańyzdy Otan qorǵaýshylar kúnimen jáne Uly Jeńis meıramymen shyn júrekten quttyqtaımyn. Biz babalarymyzdyń erligin qasterlep, eldik jolyn jalǵaǵan urpaqpyz. Memleketimizdiń qaýipsizdigin qorǵaý - Otan kúzetindegi árbir azamattyń qasıetti paryzy. Elbasymyzdyń qajyrly eńbeginiń arqasynda biz búginde Qazaqstannyń shekarasyn bútindep, irgesin bekittik. Bizdiń aldymyzda turǵan mańyzdy mindet - osy beıbitshilik pen turaqtylyqty saqtap qalý", - dedi QR Prezıdenti.
Memleket basshysy Táýelsizdiktiń alǵashqy jyldarynda elimizde joǵary sanatty, bilikti sardarlar óte az bolǵanyn atap ótti. Tuńǵysh Prezıdentimiz ár sarbazdy jigerlendire otyryp, aıbyndy ásker qurǵanyn eske saldy.
"Búginde bizdiń kúshtik qurylymdarymyz zamanaýı tehnıka men tehnologııany meńgergen. Olar kez kelgen qaýip-qaterge qarsy soqqy bere alatyn aıbyndy ári mobıldi kúshke aınaldy. Jaqynda ǵana ótken "Aıbalta-2019" oqý-jattyǵý sonyń aıqyn dáleli. Jaýyngerlerdiń áskerı oqý-jattyǵýlaryn ózim arnaıy baryp kórdim. Er jigit júregin elge beredi, namysyn eshkimge bermeıdi. Mine, búgin ortamyzda elimiz ben jerimizdi adaldyqpen aıanbaı qorǵaǵan qaharmandar tur. Olardyń arasynda adam ómirin órtten, sýdan arashalap qalǵan beıbit kúnniń batyrlary bar. Sizderdiń beıbit kúndegi erlikterińiz ben ıgi isterińiz óskeleń urpaqqa úlgi bolýy tıis. Sondyqtan búgin biz minsiz áskerı qyzmetimen, eren eńbegimen daralanǵan azamattardy marapattaý úshin jınalyp otyrmyz", - dedi Qasym-Jomart Toqaev saltanatty shara barysynda.
