Qasym-Jomart Toqaev medıtsına qyzmetkerlerin kásibı merekesimen quttyqtady

ASTANA. QazAqparat - Memleket basshysy elimizdiń medıtsına qyzmetkerlerin kásibı merekesimen quttyqtady, dep habarlaıdy QazAqparat QR Densaýlyq saqtaý mınıstrliginiń resmı saıtyna silteme jasap.

«Qurmetti medıtsına qyzmetkerleri!

Barshańyzdy kásibı merekelerińizben shyn júrekten quttyqtaımyn!

Sizder halyqtyń densaýlyǵyn jaqsartyp, ult sapasyn arttyrýǵa zor úles qosyp kelesizder.

Qazaqstanda medıtsına mamandarynyń mártebesi men bedeli joǵary bolý úshin barlyq jaǵdaı jasalýda. Memleket densaýlyq saqtaý salasyna árdaıym aıryqsha kóńil bóledi. Kóptegen zamanaýı emdeý oryndarynyń salynýy, bilikti mamandardy daıarlaýǵa bólinetin grant sanynyń kóbeıýi, osy sala qyzmetkerlerine áleýmettik qoldaý kórsetilýi - sonyń aıqyn dáleli. Túptep kelgende, munyń bári salaýatty qoǵam qalyptastyrýǵa yqpal etedi.

Sizder syndarly sátterde óz mindetterińizdi abyroımen atqaryp, el senimin aqtaı bildińizder. Barshańyzǵa qajyrly eńbekterińiz úshin shynaıy rızashylyǵymdy bildiremin.

Sizderge amandyq, baq-bereke tileımin!»,-delingen Prezıdenttiń quttyqtaýynda.