Qasym-Jomart Toqaev: Máýlen Áshimbaevtyń bul qyzmetti abyroımen atqaratynyna kúmánim joq
NUR-SULTAN. QazAqparat – Máýlen Saǵathanuly Áshimbaevtyń kandıdatýrasyn Senat tóraǵalyǵyna laıyqty dep sanaımyn. Búgin Parlament Senatynyń otyrysynda sóz sóılegen Memleket basshysy Qasym-Jomart Toqaev osylaı aıtty, dep habarlaıdy QazAqparat.
Otyrys barysynda QR Prezıdenti búgingi kezde elimizde júzege asyp jatqan mańyzdy reformalar týraly aıta kele, onda Parlamenttiń, ásirese, Senattyń róli de, quzyreti de erekshe ekenine toqtaldy.
«Senattyń eń basty mindeti – sapaly zańdardy qabyldaý. Mundaı zańdar reformalarǵa jol ashady, turaqtylyq pen tártipti qamtamasyz etedi. Senat depýtattary zań jobalaryn talqylaý kezinde nemese basqa formattaǵy basqosýlar barysynda qoǵamymyzdaǵy eń ózekti, eldi alańdatatyn máseleler jóninde ótkir oılar, synı pikirler aıtýǵa quqyly. Bul másele boıynsha daý joq. Bul rette, sizderdiń jumystaryńyz óte jaýapty ekenin jaqsy bilemin. Ózderińizge málim, meniń Jarlyǵymmen Senat depýtaty Darıǵa Nursultanqyzy Nazarbaevanyń ókilettigi toqtatyldy. Ol Senat tóraǵasy retinde bir jyldan astam belsendi ári jemisti jumys istedi. Sol úshin Darıǵa Nursultanqyzyna rızashylyǵymdy bildirdim», - dedi Qasym-Jomart Toqaev.
«Meniń Jarlyǵymmen Máýlen Saǵathanuly Áshimbaev Senat depýtaty bolyp taǵaıyndaldy. Konstıtýtsııanyń 58-shi babynyń 1-shi tarmaǵyna sáıkes Parlament Senatynyń tóraǵasy laýazymyna Máýlen Saǵathanuly Áshimbaevtyń kandıdatýrasyn usynamyn. Ol memleket qyzmetiniń qyr-syryn jetik meńgergen, uzaq jyl túrli salada jemisti jáne tıimdi jumys atqardy. Parlament jumysyn jaqsy biledi. Árdaıym ózine júktelgen mindetterdi abyroımen atqaryp keledi. Memlekettik qyzmettegi tájirıbesi mol. Sondyqtan, bul qyzmetti abyroımen atqaratynyna kúmánim joq. Máýlen Saǵathanuly Áshimbaevtyń kandıdatýrasyn Senat tóraǵalyǵyna laıyqty dep sanaımyn», - dedi Memleket basshysy Senat otyrysynda sóılegen sózinde.
Eske sala keteıik, búgin QR Prezıdenttiń usynysy boıynsha senatorlar jasyryn daýys berý arqyly Máýlen Áshimbaevty Parlament Senatynyń tóraǵasy etip biraýyzdan saılady.
