Qasym-Jomart Toqaev: Maqtaaral aýdanynda kúzge deıin qıraǵan úılerdiń ornyna jańasy salynady
NUR-SULTAN. QazAqparat – Memleket basshysy Qasym-Jomart Toqaev Maqtaaral aýdanynda zardap shekken aýyldardyń árbir azamaty qamqorlyqsyz qalmaıtynyna sendirip, sondaǵy halyqqa kómek qolyn sozǵan azamattardyń bárine rızashylyǵyn bildirdi, dep habarlaıdy QazAqparat tilshisi.
«1 mamyr kúni Ózbekstan Respýblıkasyndaǵy Sardoba sý qoımasy bógetiniń buzylýy saldarynan Túrkistan oblysynda sý tasqyny boldy. Bul – tehnogendi sıpattaǵy tótenshe jaǵdaı. Maqtaaral aýdanyna qarasty 5 aýyldyń 1 myńnan astam turǵyn úıin sý basyp qaldy. Sondaı-aq 9 eldi mekendi sý basý qaýpi týyndady. Shuǵyl qabyldanǵan sharalardyń arqasynda sý tasqynynyń ári qaraı taralýyna jol bermedik. Qazir sý tasqynynyń zardaptaryn joıý, tazalaý jumystary júrgizilýde. Qoǵamdyq tártip pen turǵyndardyń dúnıe-múlkiniń saqtalýyn qamtamasyz etý basty nazarda. Biz aýdannyń kúndelikti tirshiligin qaıta qalpyna keltirý úshin qajetti sharalar qabyldaımyz», - dedi Prezıdent Tótenshe jaǵdaı rejımin qamtamasyz etý boıynsha memlekettik komıssııa otyrysynda.
Memleket basshysy jalpy kúzge deıin qıraǵan úılerdiń ornyna jańa turǵyn úıler salynatynyn jetkizdi.
«Zardap shekken árbir adamǵa 100 myń teńge kóleminde ótemaqy tólenedi. Mal shyǵyny, tasqynnyń aýyl sharýashylyǵy alqaptaryna tıgizgen zııany óteledi. Jalpy, zardap shekken aýyldardyń árbir azamaty qamqorlyqsyz qalmaıdy. Olarǵa járdem beremiz. Zardap shekken aýdanǵa kómektesip jatqan azamattardyń bárine rızashylyǵymdy bildiremin. Tasqyn bolǵan jerde ákimdik, sondaı-aq, Qorǵanys mınıstrligi, Ulttyq ulan men Tótenshe jaǵdaı jónindegi komıtet bólimsheleri jáne polıtsııa qyzmetkerleri jumys isteýde. Otandyq jáne sheteldik iri bıznes ókilderi de zardap shekken turǵyndarǵa aıtarlyqtaı kómek bergenin erekshe atap ótken jón. Mundaı azamattardy halqymyzdyń shynaıy patrıottary, tileýlesteri deýge bolady. Barshańyzǵa alǵys aıtamyn! Qazaqstandyqtar bul joly da bir jeńnen qol, bir jaǵadan bas shyǵara bildi. Biz birge bolsaq, barlyq qıyndyqqa tózemiz. Kez kelgen mindetti oryndaýǵa múmkindigimiz jetedi», - dedi Qasym-Jomart Toqaev.
Prezıdent Qazaqstan qazir kúrdeli kezeńdi bastan ótkerip jatqanyn aıtyp ótti.
«Halqymyzdyń bekem birligi bárimizge kúsh-qýat beredi. Jumyla kótergen júk jeńil. Biz buǵan deıin talaı synaqtan súrinbeı óttik. Bul qıyndyqty da eńseremiz dep senemin», - dep túıdi Memleket basshysy.
