Qasym-Jomart Toqaev Électricité de France (EDF) kompanııasynyń bas dırektoryn qabyldady

ASTANA. QazAqparat - Memleket basshysy Électricité de France (EDF) kompanııasynyń bas dırektory Lıýk Remondy qabyldady, dep habarlaıdy QazAqparat BORT№1 Telegram kanalyna silteme jasap.

Kezdesý barysynda Qasym-Jomart Toqaev Lıýk Remonmen atom energetıkasy salasyna ozyq tehnologııalardy engizý máselesin talqylady.

Prezıdent qazaqstandyq mamandar atom energetıkasy salasyndaǵy álemdik jetekshi kompanııalardyń ozyq tehnologııalaryn zerttep jatqanyn jetkizdi.

Sondaı-aq olar jańartylatyn qýat kózderi salasyndaǵy birlesken jobalardy júzege asyrý perspektıvalaryn qarastyrdy.

Aıta keteıik, keshe 29 qarashada Memleket basshysy Qasym-Jomart Toqaev resmı saparmen Frantsııaǵa bardy.

Toqaevty Frantsııa prezıdenti Emmanıýel Makron Elıseı saraıynda qarsy aldy.

Memleket basshysy Emmanıýel Makrondy Qazaqstanǵa saparmen kelýge shaqyrdy.

Memleket basshysy Frantsýz halyqaralyq qatynastar ınstıtýtynyń prezıdenti Terrı de Monbrıalmen jáne Frantsııa Senatynyń tóraǵasy Jerar Larshemen kezdesti.