Qasym-Jomart Toqaev - laıyq kandıdat: Muhtar Qul-Muhammed úsh sebebin atady
«Men Elbasy, partııamyzdyń Kóshbasshysy usynǵan kandıdatýrany tolyqtaı qoldaımyn. Eń aldymen, Qasym-Jomart Toqaev QR Tuńǵysh Prezıdentiniń senimdi seriktesi retinde Táýelsizdigimizdiń alǵashqy kúninen-aq elimizdiń syrtqy saıasatyn qalyptastyrdy, oǵan atsalysty. Ekinshiden, Qasym-Jomart Kemeluly eń qıyn kezeńde Qazaqstan Úkimetin basqardy. Men sol kezde Úkimet múshesi retinde onyń basshylyǵymen qyzmet istedim. 2001 jyly ol Premer-Mınıstr bolǵan kezde, men sol Úkimette Aqparat, mádenıet jáne qoǵamdyq kelisim mınıstri bolǵan edim», - dedi senator «Nur Otan» partııasynyń kezekten tys HІH sezinen keıin BAQ ókilderine bergen suhbatynda.
Sonymen qatar ol Qasym-Jomart Toqaev Senat tóraǵasy bolǵan kezde ózi senator bolyp, zań shyǵarý salasynda birge jumys istegenin atap ótti.
«Úshinshiden, jer betindegi barsha qazaqtardy bir ult dep esepteıtin bolsaq, sol barsha qazaqtyń atynan álemdegi eń bedeldi halyqaralyq uıym - Birikken Ulttar Uıymy Bas hatshysynyń orynbasarlyǵyna kóterilgen jalǵyz qandasymyz. Sondyqtan elimizde de, halyqaralyq deńgeıde de tanylǵan tulǵanyń memleketimizdegi bıik laýazymǵa usynylýyn tolyq qoldaımyn», - dedi Muhtar Qul-Muhammed.
Aıta keteıik, búgin QR Tuńǵysh Prezıdenti - Elbasy, «Nur Otan» partııasynyń Tóraǵasy Nursultan Nazarbaevtyń tóraǵalyǵymen partııanyń kezekten tys HІH sezi ótip, onda 2019 jyldyń 9 maýsymyna taǵaıyndalǵan kezekten tys prezıdenttik saılaýǵa Qasym-Jomart Toqaevtyń kandıdatýrasy bekitildi.
