Qasym-Jomart Toqaev qyrkúıekte sot júıesine qatysty reformalardy jarııa etedi

NUR-SULTAN. QazAqparat – QR Prezıdenti Qasym-Jomart Toqaev qyrkúıekte sot júıesine qatysty reformalar toptamasyn jarııa etetindigin aıtty, dep habarlaıdy QazAqparat tilshisi.

«Quqyq qorǵaý júıesin reformalaýǵa qatysty aıtar bolsam, qyrkúıekte sot júıesin qaıta pishimdeýmen baılanysty reformalardyń jańa toptamasyn jarııa etetin bolamyn. Bul - Qazaqstan úshin ózekti problema. Qazir polıtsııa qyzmetin reformalaý júrip jatyr. Ol qıyndyqpen ótýde. Bul – reforma. Degenmen, túptep kelgende biz tabysqa qol jetkizemiz. Bastysy – saıası erik-jiger jáne el azamattarynyń qoldaýy», - dep atap ótti Qazaqstan Prezdıenti Sankt-Peterbýrg halyqaralyq ekonomıkalyq forýmynda.

Memleket basshysy elimizdiń quqyq qorǵaý salasynda solqyldaq tustyń da bolǵanyn jasyrmady.

«Birese izgilendirdik, endi birde qatańdattyq. Ne qalaıtynymyzǵa qatysty túsinik bolmady. Qazir biz azamattarymyzdyń qajettiligine naqty negizdelgen «ońtaıly tusty» taptyq, - dedi Qasym-Jomart Toqaev.

Prezıdenttiń atap ótýinshe, azamattar polıtseılerden satylmaıtyn qorǵaýshyny kórgisi keletinin basa aıtty.