Qasym-Jomart Toqaev: Qylmystyq kodekstiń 130-babyn dekrımınalızatsııalaý kerek

NUR-SULTAN. QazAqparat - QR Qylmystyq kodeksiniń 130-baby dekrımınalızatsııalanady. Bul týraly búgin Ulttyq qoǵamdyq senim keńesiniń 2-otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Baıaǵydan beri talqylap, qoǵamda qyzý pikirtalas týdyryp kele jatqan taǵy bir mańyzdy másele - bul Qylmystyq kodekstiń jala týraly 130-baby. Ulttyq keńestiń birinshi otyrysynda da bul másele kóterildi. Bul bapty dekrımınalızatsııalaý usynyldy. Degenmen, baıypty qarsy argýmentter de bar. Keıbir qoǵam músheleri, tipti quqyq qorǵaýshylar Qylmystyq kodekste bul normany saqtaýdy jaqtap otyr. Óıtkeni, áńgime adamnyń quqyǵyn qorǵaý, onyń abyroıy men ar-namysyn saqtaý jaıynda bolyp otyr. Óz kezeginde, keıbir memlekettik organdar 120-baptyń birinshi tarmaǵyna ǵana ózgertýler engizýdi usynady», - dedi Memleket basshysy.

Prezıdenttiń dereginshe, Qylmystyq kodekstiń 130-babyn ózgertý máselesiniń ózine ǵana Ulttyq keńestiń músheleri men memlekettik organdardyń ókilderiniń qatysýymen birneshe jumys talqylaýy ótken. Osy normany talqylaý barysynda bir sheshim tabýdyń qanshalyqty kúrdeli ekendigi anyq baıqalǵan.

«Barlyq ustanymdardy jáne bul máseleniń erekshelikterin saraptaý qorytyndysy men Qylmystyq kodekstiń 130-babyn dekrımınalızatsııalaý jáne ony Ákimshilik kodekske aýystyrý týraly sheshim qabyldadym. Buǵan qosa, ózge adamdardyń quqyǵyna kepil berý jáne olardy jala ósek pen orynsyz aıyptaýlardan qorǵaý úshin jaýapkershiliktiń joǵary sharalaryn saqtaý qajet», - dedi Qasym-Jomart Toqaev.