Qasym-Jomart Toqaev Qostanaıdaǵy iKomek ortalyǵynda boldy
QOSTANAI. QazAqparat - QR Prezıdenti Qasym-Jomart Toqaev Qostanaı qalasynda ashylǵan iKomek ortalyǵynda boldy, dep habarlaıdy QazAqparat.
iKomek ortalyǵynyń negizgi qyzmeti - turǵyndardyń ótinishterin qabyldaý, kommýnaldyq jáne jedel qyzmetterdiń jumysyn úılestirý. Negizi osy jyldyń 1 aqpanynan bastap 109 biryńǵaı nómiri engizilgen. Keıin kommýnaldyq memlekettik mekeme quryldy. Búginge deıin ortalyqqa turǵyndardan 1700-den astam qońyraý qabyldap, onyń 748-ne operatorlar tuşymdy jaýap berip, 952 ótinishti júıede tirkegen. Sonyń 548-i tolyǵymen oryndalǵan. Qazir bul ortalyqta 28 maman jumysqa qabyldanǵan.
iKomek 3 baǵytta jumys isteıdi. Áýeli qala turǵyndary men qonaqtarynan ótinishterin 4 operator qabyldaıdy. Odan ári 4 ınspektor suraqtyń sapasy men mazmunyn baqylap, atqarýshy organdarǵa baǵyttaıdy. Úshinshiden, barlyq múddeli qyzmet turǵynnyń ótinishin qarastyryp, sheshimin beredi. Osy ýaqytqa deıin 40-tan astam memlekettik organda, halyqqa qyzmet kórsetetin vedomstvolyq jáne merdigerlik uıymdarǵa tekserý júrgizildi. Barlyǵy 1000-nan astam qyzmet iriktelip, tıisti reglament ázirlendi. Ortalyq TKSh, turǵyn úı qatynastary, densaýlyq saqtaý, bilim berý, AHAT, jumyspen qamtý jáne halyqty áleýmettik qorǵaý, aýyl sharýashylyǵy, veterınarııa baǵyttary boıynsha qyzmet atqarady.
Búgin QR prezıdentiniń tapsyrmasy boıynsha halyqpen ózara is-qımyl jáne keri baılanysty jaqsartý úshin áleýmettik jelilerdiń avtomatty monıtorıngi engizildi.
Memleket basshysy ortalyq jumysyna oń baǵasyn berdi. Qasym-Jomart Toqaev óńirimizdiń áleýmettik-ekonomıkalyq damýyna aıryqsha úles qosqan bir top bıznes, medıtsına, úkimettik emes uıym, bilim salasyndaǵy azamattardy Prezıdenttiń Alǵys hatymen marapattady. Olardyń arasynda kásipkerler Abaı Muqanov pen Sergeı Blok, hırýrg Talǵat Qaıkenov, pedagog Stanıslava Şegelskaıa, úkimettik emes uıymnyń ókili Dınara Ótebaevalar bar.
