Qasym-Jomart Toqaev: Koronavırýsqa qarapaıym tumaý dep qaraý – qate pikir
NUR-SULTAN. QazAqparat – Memleket basshysy Qasym-Jomart Toqaev halyqty koronavırýs qaýpin shetke ysyrmaýǵa, saq bolýǵa shaqyrdy, dep habarlaıdy QazAqparat tilshisi.
«Koronavırýsqa qatysty ahýal kúrdeli kúıde qalyp otyr. Alaıda basqa memlekettermen proportsıonaldy turǵyda oılaıtyn bolsaq, basqa elderden qaraǵanda bizdiń eldegi jaǵdaı jaqsy bolmasa, jaman emes. Alaıda osynaý qalyptasqan jaǵdaıǵa qarap qana otyra bermeımiz. Alda úlken jumys kútip tur. Búkil qoǵam bolyp ony júrgizýimiz kerek», - dedi Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeýinde.
Sonymen birge Prezıdent koronavırýs qaýpin shetke ysyrýǵa bolmaıtynyn jetkizdi.
«Buǵan qarapaıym tumaý dep qaraý – qate pikir. Bul óte qaýipti ári jaýyz aýrý. Álemde bul aýrýdy juqtyrǵandar sany 12 mıllıonǵa jetti. Qaıtys bolǵandardyń sany artyp barady», - dedi ol.
