Qasym-Jomart Toqaev kómirtegi beıtaraptyǵy týraly strategııanyń múmkindikteri týraly pikir bildirdi
«Óndiristik shyǵaryndylardyń balansyn nólge deıin jetkizý ónerkásip pen ekonomıkada qurylymdyq ózgeristerdi qajet etedi. Ol úshin biz kómirteginiń úlesi tómen damýdyń uzaqmerzimdi strategııasyn daıyndap jatyrmyz. Reseı de bul salada jemisti jumys istep jatyr. Biz sizderdiń úkimetterińizdiń áreketin óte muqııat baqylap otyrmyz. Sondyqtan, eki eldiń Úkimetteri atalmysh problema boıynsha birge jumys istep, tájirıbe men josparlaryn almasa alar edi. Elderimizdiń ekonomıkalary úshin teris áserdi azaıtý úshin, eń aldymen, Dúnıejúzilik saýda uıymy aıasynda engiziletin normalardyń halyqaralyq kelisimderge sáıkestigine qatysty ortaq ustanymdy qalyptastyrý paıdaly bolar edi», - dedi Qasym-Jomart Toqaev Qazaqstan men Reseıdiń XVII aımaqaralyq yntymaqtastyq forýmynda.
QR Prezıdenti osy maqsatqa jetý jolynda jasalǵan is-sharalardy atap ótti.
«Ulttyq deńgeıde úlken tehnologııalyq betburysqa daıyndyq aıasynda biz aldyńǵy qatarly halyqaralyq standarttarǵa sáıkes keletin jańa ekologııalyq kodeks qabyldadyq. Kásiporyndarǵa ekologııalyq tólemderden bosatý esebinen óndiristerdi jańǵyrtýǵa múmkindik berildi. Bul bızneske eń ozyq qoljetimdi tehnologııalardy engizý arqyly belsendi tehnologııalyq jańartýdy júzege asyrýǵa múmkindik beredi», - dedi Prezıdent.
