Qasym-Jomart Toqaev: Keıbir arsyz kásipkerler kúrdeli jaǵdaıdy paıdalanyp, paıdaǵa kenelgisi keledi
NUR-SULTAN. QazAqparat – Memleket basshysy Qasym-Jomart Toqaev qoǵamda dúrbeleńge jol bermeý kerektigin basa aıtty, dep habarlaıdy QazAqparat tilshisi.
«Jalpy dári-dármek preparattaryn, ókpeni jasandy jeldetý apparattaryn satyp alýǵa, medıtsına qyzmetkerlerin yntalandyrýǵa jáne basqa da shuǵyl sharalarǵa kem degende 150 mıllıard teńge bólinedi. Qarajattyń jumsalýy erekshe baqylaýda bolady», - dedi Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeýinde.
Prezıdent sonymen birge qoǵamda dúrbeleńge jol bermeý mańyzdy ekenin jetkizdi.
«Keıbir arsyz kásipkerler qıyn jaǵdaıdy paıdalanyp, paıdaǵa kenelgisi keledi. Olar jasandy tolqýdy týdyryp, qajetti dári-dármekke baǵany ádeıi kóteredi. Meniń tapsyrmam boıynsha quqyq qorǵaý organdary alypsatarlardy jaýapqa tarta bastady. Ákimdikter reıdterdi ótkizip, osyndaı faktilerdi anyqtaýy kerek. Keıbireýler saıası oıyndardy uıymdastyrady, qaýesetterdi taratady, jaǵdaıdy ártúrli boljamdar men úndeýlermen qyzdyrady. Qoǵamda jekkórýshilik týdyrýǵa tyrysady. Mundaı manıpýlıatsııalar óte qaýipti. Sondyqtan olarǵa zańǵa sáıkes quqyqtyq baǵa beriledi», - dedi Qasym-Jomart Toqaev.
