Qasym-Jomart Toqaev: Keńes músheleri naǵyz otanshyl ári ıntellektýal azamattar

NUR-SULTAN. QazAqparat – Ulttyq qoǵamdyq senim keńesiniń alǵashqy otyrysynda eldi jańǵyrtý boıynsha mazmundy, tıimdi áńgime boldy. QR Prezıdenti Qasym-Jomart Toqaev keńestiń alǵashqy basqosýyna osyndaı baǵa berdi, dep habarlaıdy QazAqparat.

«Ulttyq qoǵamdyq senim keńesiniń alǵashqy otyrysynda eldi jańǵyrtý boıynsha mazmundy, tıimdi áńgime boldy. Keńes músheleri naǵyz otanshyl ári ıntellektýal azamattar. Olardyń usynystarynyń kópshiligimen kelisýge bolady. Birtutas is-qımyldar jospary ázirlenedi», dep jazdy Qasym-Jomart Toqaev Twitter-degi paraqshasynda.

Eske sala ketsek, elordadaǵy Táýelsizdik saraıynda Qazaqstan Prezıdenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń alǵashqy otyrysy ótti.

«Qazaqstan Prezıdenttik basqarý formasyndaǵy memleket retinde qalýy kerektigine senimdimin. Alaıda Parlament saıası júıedegi laıyqty ornyn alýy qajet», - dedi jıynda Prezıdent. Sondaı-aq, Memleket basshysy Qazaqstanda saıası reformalar qajettiligi pisip-jetilgenin málim etti.

Ulttyq qoǵamdyq senim keńesiniń alǵashqy otyrysyn qorytyndylaǵan Memleket basshysy Qasym-Jomart Toqaev qur urandatpaı naqty jumys jasaý qajettigin aıtty.