Qasym-Jomart Toqaev Qazaqstannyń Táýelsizdik jyldaryndaǵy jetistigin atady

NUR-SULTAN. QazAqparat – Táýelsizdik jyldarynda bir jarym mıllıon azamatymyzdyń turǵyn-úı jaǵdaıy jaqsardy. Bul týraly Táýelsizdiktiń 30 jyldyǵyna arnalǵan saltanatty is-sharada QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Aýqymdy reformalardyń arqasynda otandyq ekonomıka kólemi shynaıy mánde 2,5 ese artty. Jalpy ishki ónim dollarmen jan basyna shaqqanda 13 eseden astamǵa ósti jáne elimizdiń Ortalyq Azııadaǵy sózsiz kópbasshylyǵyn qamtamasyz etti», - dep atap ótti QR Prezıdenti.

Memleket basshysynyń atap ótýinshe, Qazaqstanǵa 370 mlrd dollardan astam tikeleı shetel ınvestıtsııasy tartyldy. Jan basyna shaqqandaǵy bul kórsetkish boıynsha elimiz postkeńestik keńistiktegi memleketterdiń bárinen jáne birqatar shyǵyseýropalyq elderden basyp ozdy. Qazaqstannyń halyqaralyq qory 90 mlrd dollardan asyp jyǵylady.

«Elimiz óńirlerdi, kólik ınfraqurylymyn, áleýmettik salalardy damytýda baıypty jetistikterge jetti. 13 myń shaqyrym avtomobıl joly men 2,5 myń temir jol salynyp, jańǵyrtyldy. «Batys Qytaı – Batys Eýropa» kúre jolynyń elimizdegi bóligi iske qosyldy. Kaspıı teńiziniń jaǵasynda Quryq aılaǵy ashyldy. Óndiris salasyna serpin berildi. Aýmaǵy 180 mln sharshy metrden astam úı salyndy. Sonyń nátıjesinde bir jarym mıllıon azamatymyzdyń turǵyn-úı jaǵdaıy jaqsardy», dep atap ótti Qasym-Jomart Toqaev.