Qasym-Jomart Toqaev Qazaqstannyń EAEO elderimen ózara saýdasy týraly aıtty

ASTANA. QazAqparat - Parlament Senatynyń tóraǵasy Qasym-Jomart Toqaev Eýrazııalyq ekonomıkalyq odaqqa (EAEO) múshe eldermen ońtaıly saýda kórsetkishine qol jetkizilgenin aıtty. Bul týraly ol Senatta EAEO-daǵy Qazaqstannyń saýda saıasatyn iske asyrý máseleleri týraly Úkimet saǵatynda málim etti, dep habarlaıdy QazAqparat.

«EAEO elderiniń parlamentteri men úkimetteri odaqtyń quqyqtyq bazasyn qalyptastyrý jumystaryn jalǵastyrýda. Birlestik aıasynda qabyldanǵan 20-dan astam halyqaralyq qujat ratıfıkatsııalandy. Ótken jyldan bastap jańa Keden kodeksi kúshine endi. Osy oraıda elektrondyq qujat aınalymyn paıdalaný men kedendik retteýdi sáıkestendirý EAEO-ǵa múshe elder kedendik organdary arasynda yntymaqtastyqty aıtarlyqtaı arttyrdy», - dep toqtaldy Senat tóraǵasy.

Onyń sózine qaraǵanda, syrtqy qolaısyz jaǵdaılar men táýekelderge qaramastan birlestik aıasyndaǵy ishki jáne syrtqy saýdada ońtaıly qarqyndy qamtamasyz etýge múmkin boldy.

«2017 jyldyń sáıkes kezeńimen salystyrǵanda, 2018 jyldyń qańtar-qazan aralyǵynda Qazaqstan men Eýrazııalyq ekonomıkalyq odaq elderi arasyndaǵy taýar aınalymy 7,2 paıyzǵa ósip, 15,5 mlrd AQSh dollaryn qurady», - dedi Qasym-Jomart Toqaev.